U MLA na Khliehriat uwa man leh u Montri ha ka sorkar, u Kyrmen Shylla da ong u wa iwi na ki daw i kharoi ki karkhana Coke ha East Jaiñtia Hills toh nei e NOC roi da kiwa synchaar chnong, deiwa ong wa ka sorkar ym ye ko wow khang neibynta wow e bor ya ki karkhana wow krehkaam hawa ki da pynbiang ki ya ki kot ki sla wa kiwa emkaam waroh.
Da ong u wa na i por cha i por da klam u wa ym kyrchaan ya kiwon kiwon ki kaam pyrchah aiñ neibhah wa ki pyndoohnong ki ya ki paidbah wei kamjooh ya ka sorkar, wei da ong u leh wa hawa yatoh wa ki karkhana Coke, neiliang yong ka sorkar ym ye ko wow khang hawa da pynbiang ki ya ki kot ki sla wa kiwa da pyndep ya ki kyndon wow yada ya ka rymaw, katwa ya kiwa tyngkheiñ kyndon wa kiwa man pyrchah aiñ ym toh wow e laad ya ki.
Hawa yatoh won wa pynbaad ki paidbah wa kiwa mihkhmat ym chimkhia ki ya itai i kharoi ki karkhana Coke iwa da ktah ya ki paidbah wa chong chnong ha ka thaaiñ, u Kyrmen da ong u wa ki paidbah ye ki wow pynbaad neibhah hawa booh ya ki karkhana hajan ki thaw paidbah daw em bait i ktah neidaw wa mih ka la-ær wa tngit.
U MLA na East Jaiñtia Hills da ong chooh chooh u wa ka sorkar ym ye ko wow khang ya ki karkhana kiwa da yoh ya ka NOC na ki Waheh Chnong wa ki Dolloi, tangwa da kyntu u ya ki paidbah wa kiwa pynlai chnong wow bichaar bniah bha chwa wow e ya ka NOC cha kiwon kiwon ki bru kiwa thmu wow booh ya ki karkhana, neibhah hadien wa ki yoh ki ya ka NOC, ye ki wow yaleh (Apply) neibynta wow booh ya ki karkhana, wei ym tip hadooh katwon tylli ki karkhana kiwa em ha ka thaaiñ.
