15 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1

Ka Star Cement toh e ko ya i myntoi ya ki tre chnong lada pynyaar yaka paar moochuni: Kyrmen

Advertisement ad1

Shillong: U Montri ka sorkar jylla uwa man leh u MLA ka United Democratic Party (UDP) na Khliehriat, u Kyrmen Shylla da ong u wa lada ka Star Cement yoh ko wow pynyaar ya i tih moochuni ha Brichyrnot, East Jaiñtia Hills, toh u man ko deiwa sñiawthooh yong ki tre chnong, deiwa booh chwa hakhmat ya i myntoi yong ka chnong yow wanrah ya ki kaam pynroi, la hei pynbiang ya ki sarok, ka um baam um dih, ki thaw puræ wa ka thaw sumaar leh toh u chim ki yei kitkhlieh.

Kam wow kdaw wa i thmu yong ka karkhana pynmih khyndaw-bilat, ka Star Cement wow pynman ya ka Public Hearing yow paan bor na ki paidbah yow pynheh chooh chooh ya ka paar tih moochuni yong ka ha ki bynta yong ka chnong Brichyrnot ha ka thaaiñ Elaka Narpuh, East Jaiñtia Hills District, da sepai ko la le sien na i khanglaad wei pyrchah yong ki ki seiñbhalang waphær waphær, hanla neiliang kiwa chong chnong da pynsñiaw ki yei kyrchaan yei thmu katai ka karkhana.

Hawa klam wa ki kattu katni ngut kiwa thoh khubor, u MLA da ong u ki kaam pynroi ha ka thaaiñ man ki kiwa emkaam, wei yow yoh ya ki kaam pynroi daw em bait i ktah lada haka rymaw næ ha kiwi ki liang, tangwa emkaam wow pait leh ya ki laad wa yada na i chah pynsih.

Da ong u wa iwa emkaam toh wow ap u sñiaw ya kiwa chong chnong næ ki tre chnong, tangwa da klam che u wa ka Star Cement ym toh u ksih næ chim kabu yei man wa chi sur yong ki tre chnong ya em pathan i wym ya sñiawthooh ya i ya soi ya kawon kawon ka soskular.

Hawa kylli, da ong u wa ya katni ym pu ye wow pynkut ya i leh næ i thmu yong ka Star Cement la man i iwa toh næ iwa lait, tangwa kawa emkaam toh wow ap yei sur kiwa boon wa lang wei iwa nyngkong dooh toh wow ap chwa ya ki tre chnong neibhah ki tip rap bha ki ya iwa emkaam.

Hawa yatoh wa i pyrchah kiwa boon ki seiñ ya ka Public Hearing, u MLA da ong u wa kamwa man ym ye u leh iyi iyi leh, neibhah da pyrchang neiliang ki bor pynlai District wa kiwa pynlai ya katai ka Company yow ya sñiawthooh.

Ha i jooh i por u Shylla da ong u wa ym ye wow chah hi-eh ya kiwon kiwon ki Company wow wan kamai spah deiwa suk cha ka thaaiñ, tangwa toh u e yei myntoi wei pynbiang leh ya iwa emkaam ki paidbah.

Share this:
Previous

Em wa ieh mylliñ ya ki Sandal kynthai heipor wa chong Taxi ha Jowai

Next

65 ngut kiwa dang yoh, 66 kiwa chait wa sa 2 ngut wa khlaad na u COVID-19 ha Meghalaya