U Comingone Ymbon, MLA ka 3 Raliang Constituency hawa khyruiñ u chei eh i khoo ka chnong Jowai wa maad ko lyngba i jhep, da pynrem u hajrong i khim yumut, khim i thij pyrkhat ki bru wa pyrchah thaw noh jhep, deiwa ong kani toh i bahkhlieh yong waroh neibhah la jia bait kamni, ym poi cheiwon cheiwon leh.
Ong u weileh jia kamni kat chawa mut thied thaw noh jhep ka sorkar, waroh du kiwa ya pyrchah, lada heini rukom yosar daw poi i por wot hawa thmu wanrah yei roi i paar leh daw mih i pyrchah.
“Wym ong O wymhoi u pyrchah tangwa hadooh wow hap khang chnong ha Jowai, katwon u chah ktah ki khon ki kti yong i kiwa im-ja ha Jowai wei kiwa beh yaw cha Jowai,” da ong u Coming.
Lyngba ini i klam phah haroh u ka wyrta cha ki paidbah, ki seiñbhalang wa em ha Ri-loom Jaiñtia, kamwa ki leh man ki ki khon ka Ri-loom Jaiñtia, kyntu u ya ki wow chimkhia yeini i eh i khoo wa em hakhmat dooh katni deiwa e i yakrehlang neibynta u thied thaw noh jhep, wei ka sorkar hawa thooh thaw ko daw leh lut hi ko waroh iwa emkaam katkam ka juk thymme.
Lada man kamni chisien ka sngi waroh ki chnong ha Ri-loom Jaiñtia daw em sa du i pyrchah noh jhep, kawi ka chnong daw pyrchah ko ya kawi won, iwa daw man kam ka kjut hadien habood.
Ya kini ki kyntien da klam u haka yalang saam Cheque cha ki 175 tylli ki seiñ ki warep namo ki Producer Group yong ka Laskeiñ C&RD Block ha Shangpung ynne ka sngi wada pynman da ka Meghalaya Basin Management Agency (MBMA).
