U Vincent H Pala uwa man u Member of Parliament (MP) ka Lok Sabha uwa man leh u President ka Meghalaya Pradesh Congress Committee (MPCC), da ong pyntikna u wa daw yakhun MLA u na Sutnga-Saipung Constituency.
Ka Sutnga-Saipung Constituency toh kawa mihkhmat katni da u Shitlang Pale uwa da jop na ka Congress ha ka Election 2018, tangwa da lai psiah u cha ka All India Trinamool Congress (AITC) deilang wa ki 11 ngut kiwi won ki MLA ka Congress ha ki kajiak bnai wa dadep.
Ha u snem 2018 ka Congress da jop ko du na kani ka Constituency na ki 7 tylli ki Constituency kiwa em ha Jaiñtia Hills.
Hawa klam ynne ka sngi, u Vincent Pala da ong u wa neibynta wow yakhun na Sutnga Saipung, da em kamwa 4-5 ngut ki bru, tangwa kiwa boon kiwa kyrchaan da lai ki wow pynbor ya oo wow yakhun hi ya ka Election.
Da ong u wa la ya kiwi ye u wow lai pynbor lai kroh wow yaleh ya ka Election, ileh oo won u kynran dien u, tangwa da ong u leh wa ya ka rai wa khaddooh daw chim hadien ka yalang yong ka Party.
