U Secretary ka Meghalaya Pradesh Congress Committee (MPCC) uwa man leh u MDC na Rambrai-Jyrngam, u Bajop Pyngrope da ong u wa i klam u Vice President ka UDP uwa man leh u Montri ki Kaam Pohyung ka jylla, u Lahkmen Rymbui wa ka Congress daw piah ko cha ki ar le bynta toh i klam khynnah heiwa u Bajop da ong u wa u Lahkmen toh u pait chwa u ya ka Party yong oo hi wei chwa wow kdaw kti ya ka Congress da toh u pynlum pynlang u ya ka UDP.
Da ong u wa waroh yoo ki wa ha kini ki kajiak sngi i man i long ja jylla hadien ka 13 tarik u Naisaphra heiwa neiliang u Working President, u Paul Lyngdoh da ong u wa u Lahkmen da toh u hiar chuki noh u deiwa bahkhlieh yeiwa jia.
Chooh chooh u MDC ka Congress da ong u leh wa neiliang u General Secretary ka UDP, u Dr. Jemino Mawthoh da klam paidbah u wa u Lahkmen ymtoh de u ksoh u yei kaam kam u Montri ka chnat Pohyung, deiwa pynrap wa ini pynyoo i wa ha ka UDP kawa em 7 ngut ki MLA da yaknieh man heh ki para ki.
U Bajop da ong u wa boi i klam u Lahkmen pyrchah ya ka Congress toh neidaw wa da boon ware i chah kynthah wa i chah pynbaad kani ka sorkar wa emlang ka UDP, wei i chah pynbaad ymtoh de du kiwa em ha ka liang pyrchah tangwa wot ki paidbah yoo ki yeini wei da tip che kayi ka ka UDP, kawa man ka Party kawa uwi uwa yahkhmat klam u da iwi katwa uwi won deiwi, weiwa ki paidbah daw jubab ki ya ka UDP ha u snem 2023.
