U Montri ka chnat Bordiñ, u James PK Sangma da ong u wa ka United Democratic Party (UDP) da toh u pynbaad ko yaka sorkar ka warim ym toh ya ka sorkar MDA hajrong ka kynrum kynram wa mih hapoh ka MeECL khamtam hawa yatoh wa ka Load Shedding.
Da ong u wa i pynsñiaw yong kiwa yahkhmat ka UDP man i iwa toh, tangwa u ya pynbaad ya ka sorkar wa katni man ko iwa bakla, heiwa toh u pynbaad ya ki bru wa yahkhmat ya ka sorkar wa nachwa kiwa pynlang wei boohteiñ wow su ya ka poisa, neibhah i eh ha ka chnat Bordiñ toh iwa da boon boon snem.
Hawa klam ynne ka sngi wa ki laad pathai khubor, u James da ong u wa i dap ram yong ka Meghalaya Energy Corporation Limited (MeECL) toh iwa da boon boon snem, wei ym toh iwa suk wow pynbait noh katni katni, ini toh iwa emkaam ya i ya krehlang, deiwa ong wa ka sorkar da pyrchang ko katwa ye yow pyndooh yei eh wei emkaam leh ya i kyrchaan wei ya krehlang yong ki paidbah.
Da ong wa ka UDP toh u pynbaad ko ya kitu kiwa kular ya ka poisa T. 844 klur, tangwa wym em pynmankaam ya ini iwa da pynman won ya ka MeECL wow hap wow sai hadooh T. 712 klur yow su ya ki wakreh. U James da ong chooh chooh u wa toh wow pynbaad ya kitu ki bru kiwa da soi ya ka Power Purchase Agreement kawa wanrah yei eh katni ya ka jylla.
