Ka VPP ha Jaiñtia yaroh ko tangwa mar ya poi Lad Smit ong ko wym de kiwa sarong kam ki Jaiñtia: Sniawbhalang

U Symbood Montri Rangbah ka jylla, u Sniawbhalang Dhar haka yalang paidbah neibynta ka Election MP ha Iooksi wa da pynman ynne da ong u wa ki heh ka Party VPP manda poi ha Jaiñtia yaroh ki deiwa ong wa ym em de kam ki Jaiñtia tangwa mar ya poi ha Lad Smit ong won ki wym em de wa sarong kam ki Jaiñtia.

Da ong u leh wa kani ka Party ym poi ko cheiwon cheiwon leh tangwa man ko ka Party kawa chkæh bha u pynbiej ya ki paidbah heiwa du wow yoh Vote da klam beiñ da kynnoh ko kat ya kiwa em wot ya kiwa kitkaam niam kamwa da yoo ha ki Social Media.

U Sniawbhalang da ong u wa em uwi u bru na kani ka thaaiñ uwa jooh yalai lang bha waka NPP uwa ha kini ki 2-3 sngi da mut u wow kylla noh neidaw wa bang ware i sur, hawa kamtæ u jied ya i sur mo ya ki bru mo wow man kam kiwa mihkhmat.

Chooh chooh da ong u wa boon ki paidbah ymtip ki wa u kyrtong ka VPP toh u yong Syngkon wei u pa u leh u yong Syngkon wei ka Party da kam ko wa da leh ko chiboon hapoh ka jylla, tangwa iyi leh ko ma-ai?

Da ong u wa i psiah u Nehemayah Tyngkan cha ka NPP toh neibynta i roi i paar ka thaaiñ wei i kynnoh wa har rukom jooh mih i ha kam kini ki por Election wei man i chibynta yong ka synchaar paidbah.

Heijooh i por da ong u wa ka VPP toh kawa ym yatoh wa kawon kawon ka Party la ka Congress, ka UDP, ka BJP næ ka NPP hawa kamtæ weiyi hi u krehlang u lada jop u kyrtong yong ka?

Da ong u leh wa u Vincent Pala toh u bru wa bha tangwa la 10 snem wa chong ha ka Liang Pyrchah kiyi ki kaam pynroi wa ye u wow wanrah? 

Kamtæ da kyntu u ya ki paidbah wow lai da ka luti wa bha yow yoh myntoi ka jaitbru yong i.

Heiyatoh waka UDP da ong u wa man ko kam ka nan dakha heiwa u ku leh ym ku wei u hiar leh ym hiar ko, kamtæ emkaam u kynmoo wa hawa jied ya kiwa mihkhmat wa emkaam u pyrkhat yaka roi ka paar.

Da ong u wa kiwi ki Party klam ki yeiwa daw leh ki tangwa ka NPP dadep ko wow leh.

U Sniawbhalang da kyntu u ya waroh wow jied yaka kyrtong ka NPP neibhah wa kani man ko ka sien wa nyngkong wa ka Party u pynyakhun ko na ka Shillong Constituency wei wa ki manbei toh kiwa pait yaka yung ka sem kamtæ ngait skem u leh wa ka Dr. Ampareen leh u pyrkhat khia ko ha Parliament neibynta ka Constituency wa ka jylla waroh kawi.

Da pynrap u leh wa manda jop ka Dr. Ampareen chi sngi u riam ko dei yong Khasi wa chi sngi dei yong Jaiñtia yow tip wa ka burom em ko katkam ka jaitbru yong i hapoh ka jylla.