Ynne ka sngi kiwa yahkhmat ka Voice of the People Party (VPP) wa kynthup ya u President, u Ardent Miller Basaiawmoit uwa man leh u MLA ka Nongkrem Constituency deilang wa u Dr. Ricky Syngkon uwa man leh u kyrtong MP ka Party na Shillong, hei synranlang u MLA ka VPP na North Shillong, u Adelbert Nongrum wa kiwi da wan hiar ki ha Jowai neibynta u pynche paidbah yaka yurim yong ka Party heijooh i por leh wow paan kyrchaan na ki paidbah heiyatoh waka Election MP kawa daw wan.
Haka yalang wa da pynman ha Iawmusiang, Jowai u Dr. Ricky Syngkon da pynsñiaw u yei daw wa sdang yaka VPP toh wa yoo ki yei man i long ka jylla heiwa ka luti warim wym yah ko chei kyrmen næ i chngaaiñ yaka mynried u paidbah. Tangwa da nang hiar hei puræ puthi, i dooh mynsien wei i daw toh wa i synchaar khadar ymtoh de da ka yurim i hok wei sakhiat kawa lait nei baam tooh wei kawa ñiaw chiliang khmat.
Hawa kyntu ya ki paidbah wow e kyrchaan ki yaka VPP ong u, to u yeiñ i sa chisien yow tei biang yaka ri waka jaitbru katni neibynta ka mynried ki khon ki kti yong i.
U Ardent Miller Basaiawmoit won hawa klam da kynthah u ya kiwa mihkhmat hajrong i dooh tulop kiwa kreh ka JHADC, hajrong i chah leh chiliang ki paidbah, hajrong i dooh i hiar arsut ka jylla ha ki bynta waphær waphær, hajrong i tieñ, i chong sahiar ki paidbah wa kiwi de wei da kynthah u leh ya u MLA ka Jowai, u Wailadmiki Shylla.
Kamtæ pynrap u wa ka yurim yong ka VPP toh yow pynlait yaka ri nei baam tooh, nei dooh, nei tieñ wa nei leh chiliang khmat deiw pynwandur thymme ya ka mynried ka mankawi.
Ong haroh u wym em kwah ki wa ka spah wa da kyrkhu u Blai u li tasbah ko du ha kawi ka manyung, tangwa toh u yoh byntalang da waroh u paidbah.
Pyntikna haroh u ya ki paidbah wa lada e laad yaka VVP u synchaar ko neini chakhmat daw wan i chngaaiñ, i im wa pahooh pahai deiwa e nongmuna ya u Lee Kuan Yew uwa man uwa pynku yaka Singapore kawa em du 640 Square Kilometer i heh, tangwa da pynman u yaka kam ka ri kawa paaw ha pyrthai du hapoh ki 35 snem lyngba i synchaar khadar wa khooid.
Kamtæ ong u wa wym em de da kawi tawon ka laad ka luti wow pynku yei yoh i la, i chongsuk chong chngaaiñ, i im wa salonsar lait nei synchaar khadar kawa khooid ym deiwa pynbiej.
Discussion about this post