Ka Wah Umkhrah em ko ha ka kyrdan ‘E’ hei yatoh wa i tngit ko

Shillong: I tngit ka Wah Umkhrah wa ka Wah Umshyrpi da pynman ko ya u MLA ka KHNAM na North Shillong wow pan yutip wa hadooh katwon u pood i tngit yong kini ki wah.

Hawa jubab yeiwa kylli, neiliang u montri wa pait ya ki kaam pynroi sor, u Hamletson Dohling, da ong u wa kini ki wah da tngit ki chawa palat wei katkam wa dadep pynman ya ka thooh bniah kani ka um biang ko du wow e um cha ki lyngkha, u e um ha ki karkhana wei ymye u pynemkaam ki da iwi tawon.

U montri da ong u wa katkam wa da chem da ka Central Pollution Control Board, New Delhi, ya ka wah Umkhrah da pynhaap hapoh ka kyrdan ‘E’ kawa pynyoo wa biang ko du wow e um lyngkha wei wow pynemkaam ha ki karkhana.

Katkam i thaw i chem wa kiwa im ym ye de ki u im ha kani ka wah neibhah la-ær kawa em ha ka um namo ka Dissolved Oxygen wa pynemkaam ki dakha wa kiwi kiwa em ha ka wah toh kawa da wiar wei sah sa du ki la-ær wa tngit wa man bih hi-eh.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

Da ong u wa ka Meghalaya State Pollution Control Board jooh pynman ko ya i thooh bniah yow tip yei rukom man ka wah Umkhrah hapoh ka National Water Monitoring Programme (NWM) wa da kyrchaan poisa da ka CPCB ha ki soo thaw wa kynthup ha Demthring, Urkaliar, Mawlai-Slaughter wa ha Mawpdang.

Hawa jubab chooh chooh yeiwa kylli wow yada nei pyntooid tngit chooh chooh cha ka wah, neiliang u montri da pyntip u wa ka sorkar lyngba ka Meghalaya State Pollution Control Board (MSPCB) da hukum ko ya ki Hotel, Guest House, Restaurant wa kiwi kiwi wow pyndait ki ya ki Effluent Treatment Plant (ETP).

Da pyntip u leh wa hadooh katni kiwa pyndait ya ki ETP’s da em 69 tylli ki Hotel, 19 tylli ki Guest House, 37 tylli ki Restaurant, 4 tylli ki karkhana kari wa 11 tylli ki Hospital kiwa em ha Shillong.

Hawa pynrap lang yeiwa kylli, neiliang u MLA ka Nongthymmai, u Charles Pyngrope won da kwah u wow tip hadooh katwon tylli yung wa da chem ka sorkar na ka thaiñ Demthring-Urkaliar kiwa pyntooid tngit cha ka wah, u montri da pyntip u wa em ki 35 tylli ki manyung.

U Charles Pyngrope da e yumut u leh ya ka sorkar wa toh u hukum ya waroh ki bru wym toh u pynkai jhep ki kamjooh wow noh jhep cha ka wah da i rukom wym toh.