Ka yalang hajrong kammon u pynneh pynsah wei wow pynmiat ya ki wah ha sor Shillong kam ka Wahumkhrah, ka Umshyrpi wa ka Wah Umkhen da pynman ynne ha Yojana Bhawan, Shillong heiwa da embynta u Montri Rangbah ka jylla, u Conrad K Sangma, u Symbood Montri Rangbah, u Sniawbhalang Dhar, ki Montri kam u AL Hek, u Chief Secretary, u DP Wahlang wa kiwi kiwi.
U Conrad da ong u wa i daw wa pynman ya kani ka yalang toh wow tipmit ya i duna wei wow thooh ki laad wow yada wei wow pynneh ya kini ki le tylli ki wah wa em ha Shillong deiwa kyntu ya i yakrehlang ki dorbar chnong wa ka imlang sahlang.
Chooh chooh da ong u wa emkaam u man iwa salonsar hapyrdi i man i long talawiar soodong ka rymaw wa i khayi pateiñ wei kani ka yalang toh wa rap khroo ko ya ka sorkar wow pynyatoh ya ka khayi pateiñ, i khih i kreh wei wow yada ya ka rymaw neibynta ka mynried mankawi. Da ong u leh wa ka sorkar thrang ko wow yada wei wow pynkhooid ya waroh ki wah ha ka jylla.
Da khana u leh ya ki kaam wa ka sorkar da leh ko heiyatoh wa i kylla i man i long i suiñbneiñ namo Climate Change Mitigation, wow pynlang ya ki jhep wa i khang pyndam ya ki Plastic wa ye u pynemkaam chisien donhi, wow pynduna yei pynmih tdem, deiwa pynchlur wow pynemkaam ya ki kari wa pynemkaam da ka bordiñ, wow thung dieñ kamjooh i pynsñiawthooh paidbah wa kamjooh ya ki khynnah hajrong ini.
Chwa ini u DP Wahlang da ong u wa em ki hukum ka NGT wow yada ya ki wah wei ka Wahumkhrah wa ka Umshyrpi toh kiwi na ki 45 tylli ki wah wa jakhlia (Polluted) tam ha ka ri katkam wa ong ka NGT. Da kyntu u ya i krehlang ka KHADC, ki dorbar chnong, ki seiñ kreh monsñiawbha wa kiwi kiwi.
