Ynne ka sngi u montri rangbah ka jylla, u Conrad Sangma da wan booddien u ya i man i long i yakhun ya ka khlam COVID-19 ha waroh ki ar District ka Ri-loom Jaiñtia heiwa da pynman ya ka yalang wa ki heh District na ka East wa West Jaiñtia Hills kamjooh wa ki sahep na ka chnat i chait i khiah.
Ha kani ka sngi da emlang leh ki ar ngut ki montri ka sorkar jylla kiwa kynthup ya u Lahkmen Rymbui wa u Sniawbhalang Dhar kamjooh leh u MLA ka Jowai, u Wailadmiki Shylla.
Neiliang u Conrad da ong u wa katkam wa man ynne ka sngi, ka West Jaiñtia Hills man ko kawi na kiwa da chah ktah joor dooh ha kani ka khlam COVID-19 heiwa ka Positivity Rate (kiwa yoh COVID-19 na kiwa chah Test) man ko 33% heiwa ka hapoh ka jylla (State Average) man ko 12.9% iwa man le chah ha West Jaiñtia Hills.
Da ong u leh wa ka East Jaiñtia Hills man ko kawa duna heiwa ka Positivity Rate man ko du 9% wei hanla kattæ leh dang man hi i iwa boon.
U Conrad da ong u wa na ini i daw wa joor yabi uni u khñiang da chah ktah ki bru ha kini ki ar District wei ini i daw wan booddien ki ynne wa ki heh ki ar District kamjooh leh ki sahep ka chnat i chait i khiah wow tip kammon u leh neini chaphrang wow pynduna ya i chah ktah ha kani ka khlam.
Chooh da ong wa kiwi ki District kiwa da chah ktah joor bha wa heh ka Positivity Rate toh ka East Khasi Hills 19%, South West Garo Hills 12%, East Garo Hills 11%, Ri-Bhoi 10% katwa kiwi ki District won ka Positivity Rate em ko hapoh 5%.
Da e yaroh u leh ya ki bor chnong wa da wan ki chaphrang wow yarap hei yakhun pyrchah ya kani ka khlam.
