U Montri Rangbah ka jylla u Conrad Sangma hadien wa pynman ya ka Review Meeting ynne ka sngi ha Jowai lyngba ka Video Conference wa ki Montri sorkar deilang wa ki heh ka District, da pybna u wa daw pteiñ ya ka Lockdown ha East Khasi Hills hadooh ka 21 tarik uni u bnai.
Da ong leh wa hanla da sdang wow duna kiwa yabi COVID-19 ha kiwi ki District tangwa ym toh u kheiñstiñ neibhah ka Positivity Rate namo i boon kiwa yoh ya uni u khñiang na kiwa chah Test dang man ko kawa maa hi wei ym pu em hiar ko hapoh u pood yow man chngaaiñ.
Hajrong ini da chim ya ka rai da ka Cabinet wa ya ka East Khasi Hills kawa man kawa chah ktah dooh u pteiñ hi ka Lockdown katwa ya kiwi ki District da e bor ha ki DC wow leh ki heiyatoh wa ka Lockdown wei kiwa boon ki District u pteiñ ki ya ka Lockdown iwa daw chong khaddooh hei rai ki DC.
U Conrad da ong u leh wa hawa pteiñ ya ka Lockdown, da chah ktah i khih i khan ki bru, kamtæ ka sorkar da chah ko wow wai 20% ki dukan ki wym haap hapoh kiwa dai ya ki marbaam mardih kiwa daw chah noh u wai ki ha kiwa boon ki bynta ka jylla.
Da pynrap won u deiwa ong wa da e bor leh ya ki DC wow khang leh yei wai kini ki dukan iwa man hei long i man i thaw.
Da e bor leh ya ki DC wow chah ya ki kari kamai hadooh 20% na waroh kiwa em.
Da ong u haroh u wa ya ka West Jaiñtia Hills neidaw wa dang heh ka Positivity Rate ko kawa man hadooh 33% iwa da man iwa maa bha heiwa hapoh ka jylla ka Positivity Rate man ko 12.9% kamtæ hap hi wow pteiñ ya ka Lockdown.