Jowai: Ynnin ka sngi ka Raliang Elaka Arts & Cultural Organisation (REACO) da pynman ko ya ka Yadaw Masi Rong ha Madan Pamsna, Laskeiñ heiwa u MDC ka JHADC u Bison Iano da man u kam u kongsan hei emlang u Dolloi ka Elaka, u Chawas Lyngdoh, ki waheh chnong ki chnong wa haap hapoh ka Elaka wa kiwi kiwi.
Hachwa kani ka Yadaw Masi da em ka suit ka choor ka e ngooh e dem ya ki Blai ki Syiem da u Pator, u Dolloi, ki 7 Waheh wa kiwi kiwi.
Chwa wow pynman ya ka yadaw masi da em ka yalang ya kawa da pynlai da u Pynbait Lyngdoh, Waheh Chnong ka chnong Laskein.
Neiliang u Dolloi, u Chawas Lyngdoh hawa e i klam da ong u wa kani ka yadaw man ko kawa da yah na ki por warim heiwa da ngait wa lada jop ki masi na neiñ u bha u kba cha ka phang neiñ katwa lada jop ki masi na wah u hoi u kba cha phang wah, nadooh na Madan Pamsna chaneiñ da kheiñ wa man kiwa na neiñ katwa chawah won da man ki chawah.
Da ong u wa kani man ko ka lympung ka wow yachemlang ki khon ka Elaka hadien wa dadep ki u thung u bet ya u kba u khoo ha ki hali deiwa kyntu u ya waroh wow yawan ki cha kani ka lympung yow pynphooh pynphieñ ya ka.
Neiliang u B. Iano hawa e i klam kam u kongsan da ong u wa kani man ko kawa da yah kyrpang da ki waheh wasian wow em itæ i mynsien imlang sahlang wei wow pynkmen ya ki warep chisien chi snem hadien wa dep thung dep bet ki.
Da e yaroh u ya ka seiñ kawa da pynneh pynsah ya kani ka lympung, deiwa kynmoo wa nachwa aw waroh ki manyung em ki ka trep masi tangwa ha kani ka juk ym em de kamtæ wei katni da ki klur wa pynlut wow wanrah masi na baar jylla.
Heijooh i por neidaw wa duna i wanpoi ki khon ka Elaka ha kani ka sngi, da kyntu u ya waroh wow yawan cha kani ka sngi khnang wow ye u pynneh pynsah ya kani ka lympung wei wa ini i pyrchang kani ka seiñ ym man de i iwa sepai.
Ha kani ka sngi da yoh leh u sakhi wa wanrah ki khon ka Elaka ya i baam tynre wow e sñiawbha ya u Dolloi, ki waheh ka Elaka, kini ki baam kynthup ki i jadoh, ja salah, baaiñ, doh syiar, doh syndang, i sadhiar, wa kiwi kiwi.
Da pynphooh chooh chooh ya ka sngi da ki chaad na ki khon ka Elaka kiwa wan ka chnong Raliang, Laskein wa kiwi kiwi.
Hadien ini waroh da sdang ka yadaw masi, heijooh i por kam wow pynchlur ya ki khon ka Elaka da pynkup burom ya kiwa da yoh marks heh dooh ha ki exam SSLC wa HSSLC.
Ha ka SSLC da pynkupburom ya ka Sookini Suchiang kawa da yoh 90.16 %, ha ka SSLC, ka Nakasaki Dkhar kawa da yoh 64.8% katwa ha ka HSSLC (Science) ka Banrilin Tyngkan wada yoh 72.6% ha ka HSSLC (Arts).
Ha kani ka sngi da pynman leh ya ki yakop yataan tylle hapyrdi ki chnong hapoh ka Elaka kamjooh leh ka yakob phet pyllah, ka yalehke Football wa kiwi kiwi.
Discussion about this post