Jowai : Ka yalang paidbah wa pynman ynne ka sngi ha pchem ka petrol pump wa em ha jan Laad College KNGC wa pynman da ka MPUF da wan sakhi da ki kattu katni ki bru wa kynthup ya ki manbei na ka chnong Nongkynrih, West Jaiñtia Hills.
U president ka seiñ Chirup U Krehlang I Society u W. Laloo hei yatoh wa i daw wa pynman ya kani ka yalang kam ka dak wow pyrchah yei chah kyrriah kaam u DC ka West Jaiñtia Hills u Arunkumar Kembhavi da ong u wa lada kamni kyrriah kaam ka sorkar ya u bru wa kreh chitom wei u wym tieñ u pynkhooid ya ki kaam wa sih hapoh ka district kiwa wan hadien yong oo leh ym nood de ki u kreh ya i bha i miat ka imlang sahlang.
U General Secretary ka AHPUF u C. Sungoh da ong u wa oo dei langær da sakhi u yei kreh chitom uni u DC khamtam hei wan u da oo heipor yut chnong ki bru Pnar na Block-1 wei hapyrdi u slap dei miet u DC da wan u wow yarap ya kiwa yut chnong. Da pynkynmoo u leh wa dei chlur yong oo katni da ye u pyndep ya ka yingkieñ Kureliya kawa da sah kut da boon boon snem.
U R. Suchiang uwa na ka chnong Nongkynrih da ong u wa ki kam kiwa dooh wa duk deiwa em uni u DC da lai bait ka kreh 100 sngi ha ka chnong yong ki iwa yarap chiboon ya kiwa chong chnong. Da ong u leh wa yooluti u wa daw boon ki paidbah wow wan cha kani ka yalang lada bichaar yei ood ki paidbah ha ka Facebook tangwa yoosar boon toh kiwa tein u wan cha khmat.
U president ka MPUF u D. Laloo da kdaw kti u wa ki MLA wa leh yeini phah kyrriah kaam ya u DC neidaw wa pyrchang u wanrah ya iwa boon i kylla hapoh ka DSC heiwa ong wa kani toh ka yaaw wa heh bha heiwa ya iwi i kreh da dai ya ki da ki lak tyngka. I wa leh u DC da pynyoh mynsien ko ya ki khynroo khyllood kiwa ym em ya i kyrchaan na ki heh ki haiñ.
Kani ka yakhih yow pynneh ya u Arunkumar Kembhavi da pyntip leh daw pteiñ ya ka da ka lai paidbah, ka chong kylleiñ myngor ha office DC wa i chah thngan.
Discussion about this post