Ka yalang wa kyrpang kiwa dih drugs wei kiad

Jowai : Ha ka yalang wa rap phær hei yatoh wa kiwa dih drugs kawa pynman ynne ka sngi da em du kiwa dang

chah kdoh ha ki drugs kamjooh wa ki seiñ wa kreh hei yatoh wa kiwa yarap ya kiwa kwah noh u lait na ki drugs wa i kiad.

Ha kani ka yalang ym em khut ya ki khynnah skur namo i lai paidbah, da man sakhiat i yaklam wow yarap ya kiwa emkaam i yarap, i kyrchaan wa i pynchlur yow lait na u kynjri drugs wa kiad.

Ya kani ka yalang da pynman da ka Office ka District Social Welfare Officer, West Jaiñtia Hills District Jowai heiwa ka Dr. J.N. Shullai, Project Director Mihmyntdu Community Social Welfare Association, Jowai da man ko kam ka kongsan.

Ka N. Pakma, Programme Manager, VHAM, Jowai da klam ko kam kawa da ye u lait na ki drugs wei da khana ko yeiwa ktah ki drugs yei doh i pran i pyrkhat pyrdaiñ wei deibor samen eh u jop yei kyrni ki drugs.

Kamtæ emkaam i kyrchaan nadooh kiwa ha yung ha sem, ki paidbah kamjooh ki pulit yow yoh mynsien kiwa pynemkaam drugs wow yakhun wow lait na iwa chah ksoh ki ha i drugs.

Da ong ko leh lada em wa tyrwa drugs ya phi toh u kyntait phi neibhah chisien da maad boon i por ym ye de u kyruiñ dien.

Neiliang ka Social Economic & Life Development Association, Jowai (Breakthrough) Synod Mihngi Jowai da wan klam da u L. Garod u Coordinator kani ka seiñ da ong u wa i kyrni u Drug wa i kiad ymtoh ka kaam Politics kani toh ka kaam samen ka kaam wa ye u pyndooh da kiwa chem chitom wa kiwa kreh lang wa ki wei toh u chlur u yimphoo wa ye sakhiat u pyndooh ya ini waroh.

Ka kongsan ka Dr. Shullai ong ko wa ya kani ka yalang toh da thmu u pynman nadooh ka 26 tarik u Naiynru kam chi bynta ka International Day Against Drug Abuse and Illicit Trafficking tangwa neidaw wa haap ko ha ka sngi Bibar kamtæ da pynman ya ka ynne kam ka Awareness Programme ha Yungwalieh ka Dulong.

Da ong ko leh wa ha uni u snem ka pyrthai da pyrchang ko deiwa rap phær neibhah ka phang toh “Listen First” iwa yatoh wa ki bei ki pa wow snieñ ki ya ki khon nadooh dang khian wei wow pynlut por wa ki khon neibhah boon ki khynnah poi ki cha ka luti wa bakla wa ym yoh por ki bei ki pa ya ki.

Da pynchlur ko leh ya kiwa da em khon kiwa man leh kiwa pynemkaam drugs wa toh ym hoi u e laad ki wa ki khon ki u poi ki cha ka jooh ka luti.

Kamjooh leh ong ko wa kiwa em kjut HIV wa ym hoi u murieh ki ya i kjut ki neibhah katni em ki dawai wa ye ki u dih wa ye u yarap ki u im kamwa im kiwi kiwa ym em kjut kamjooh leh u pynim slem ya i rta yong ki.