15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1
Advertisement ad1
Advertisement ad1
Advertisement ad1

Ka yaw wa chi sngi ki wa rep

0 Comments

Jowai : Ka yaw ki wa rep kawa chi sngi da pynman ya ka ynne ka 8 tarik ha madan Iawmusiang, Jowai. Da wan wai ya ka da u ma C. Ymbon, Parliamentary Secretary of Soil & Water Conservation. Ha kani ka yaw da wan pynyoorong ya ki mar ki warep, ki wa soor that, chna tiar pynriam yung, ki wa dai syiar Kurolier, Rapasa, Umngap wa kiwi kiwi.

farmer's-market3

Hei ktien lamphang wa e da u ma W. Rymbai Additional Director of Soil & Water Conservation, Meghalaya, Shillong, da pyntip u wa ki wa emlang ha kani ka yaw ki wa rep toh du kitu wa yoh myntoi na ka Integrated Watershed Management Programme (IWMP) kamjooh kiwa da pyndep hadooh 25% na ka ka thong wa da booh ya ki. Da ong chooh chooh u wa katni em ki 11 tylli ki IWMP project ki wa pynkreh ha Thadlaskein Block, Laskein Block wa ha Amlarem Block ki wa kynthup ya 59 tylli ki chnong. Hapoh ka Thadlasekin Block em 25 tylli ki chnong, ha Laskein Block em 26 tylli wa ha Amlarem Block em 8 tylli ki chnong. Ka posai wa da pyllait ya kani IWMP toh T. 5536 Lak wei da dep pyllut hadooh T. 2889 Lak.

farmer's-market2

Hapoh kani ka IWMP da pynkrehkaam leh ya ki thaw pyllang um (watershed), hapoh ka Laskein Block wa yoh ya san tylli ki project da em 17 ki watershed, ha Amlarem Block wa em ar tylli ki project da em 5 tylli ki Watershed wei wa ha Thadlaskein Block wa em soo tylli ki project da em hadooh 23 tylli ki watershed.

farmer's-market1

farmer's-market4

U A. Kembhavi DC, West Jaintia Hills ong u ki mar wa pynmih na ka district kam i Umngap wa u Chyrmit toh ki wa miat wei wa bha bha hadooh wa ye u nujor wa kiwi wa em hapoh pyrthai. Kamtæ da ban joor u yei emkaam u song bha (packaging) ya ki mar dei wa e nongmuna u wa lada dai ya i Umngap ha ki klong wa dai katni ki wa ym em pyrtuit cha kiwi ki chnong ym em wa bien u thied ya ki. Da khana u leh wa na liang ki bor distrik da kynjoh ktien ki cha ka Spice Board of India yow e kyrdan ya u chirmit Lakadong yow pynsakhiat hadooh katwon man kyrpang u chirmit wa mih na ka distrik.

farmer's-market5

Sniaw kmen u leh wa yoo wa kat dang lai ki sngi dang boon ki bru warep neibhah i rep toh i wa neh yanom.

farmer's-market6

U kongsan ha kani ka sngi u ma C. Ymbon, MLA ong u wa jooh yoo u wa ki wa rep katwa dang lai ki por dang dooh ki ha ka liang ka poisa. Neitæ i daw ong u hap rep ki katkam i stad sayan wa katni ymtoh u sarom ki u yachem wa ki bru sorkar wa pait ya ka rep ka riang yow yoh ki ki buit thymme wow pynku yei rukom rep yong ki. Da pynknymoo u leh toh u kynmoo u pynneh pynsah ya ka rymaw deiwa pyndooh noh ya i thang khloo wa myllien bha ki bru kam ha kini ki bnai.

Ha kani ka yaw ki wa rep da em hadooh 40 tylli ki dukan wei da yabhah ya ki ha ar bynta kiwa wan kam ki wa rep samen wa ki Self Help Group. Da wan ki leh na ki chnong wa boon kam ka Sohmynting, Mynsngat, Niriang, Mukhla, Umladang, Sohkha, Sabah Muswang, Saphoh, Larnai, Nongtalang, Saphai, Raliang, Mukroh, Changpung wa kiwi kiwi.

Da pynkut ya ka deiwa saam ya ki wa jop ha kiwa boon ki yakop nadooh ki wa em ya ki wa bha dooh ki jhoor, ki that wa soor wa kiwi kiwi. Da e leh ya ka song poisa wa T. 5,000 cha ki wa jop, T. 3,000 cha ki wa wan wa ar wei T. 1,000 ya ki wa yoh wa le.

farmer's-market7

Da pynman ya kani ka yaw da ka Divisional Soil & Water Conservation Officer Jowai Territorial Division, Jowai.

Share this:
Previous

Chah pynkup burom ki 20 ngut ki nongthaiñ that

Next

Yap ar ngut hei tyngkhooh kari mynsoo ar ngut