Jowai: U Chief Executive Member (CEM) ka Jaiñtia Hills Autonomous District Council (JHADC) u ma Thombor Shiwat ong u wa ka yingkieñ Kureliya ha ka Wah Myntang, kawa pynyatoh ya ki thaiñ Sahsniang wa ka thaiñ Chiliang Myntang hap ko hapoh u pood u ang yong ka Jaiñtia Hills Autonomous District Council.
I kreh wow pyndep ya kani ka yingkieñ ki bor District yong ka Karbi-Anglong Assam ym ye ki u pynwit næ u pynsangeh.
Chooh chooh u Chief Executive Member ka JHADC da ong wa dang ha kini ki khajiak sngi kiwa kitkaam chnong yong ka Psiar, Mooluber, Khatkasla wa kiwi kiwi da wan pynthymme ki ya ki rukom kitkaam chnong yong ki cha ka Ophis yong ka JHADC.
Da pteiñ u ma Shiwat deiwa ong wa heiwa kini ki chnong em ki ha chiliang yong kani ka yingkieñ Kureliya mut dang hap ki hapoh u pood u ang yong ka Jaintia Hills Autonomous District Council kammon won wa ye u wan luchia da ki bor District yong ka Karbi-Anglong Assam.
U Chief Executive Member da ong u leh wa ki bor yong ka Autonomous Council yong ka Karbi-Anglong Assam ym ye ki u kam tre ya ka yingkieñ Kureliya ha ka Wah Myntang neidaw wa i thaw dang haap i hapoh ka Jaiñtia Hills.
Da pynkut deiwa ong wa u Contractor wa kreh ya kani ka yingkieñ toh u kreh u hadooh wa dep.
Discussion about this post