U Montri Rangbah ka jylla u Conrad Sangma heiyatoh wa i kaam tih mooyong, hawa e yei klam ha ka yalang lehkmen Republic Day ha Shillong ynne, da ong u wa ka sorkar yong oo da chim ko ya ka rai wa pura ha 2019 hajrong i khang ya ini i kaam da ka NGT ha u 2014.
Da ong u wa chwa u 2014 ini i kaam ym em phær i tangwa hadien u 2014 won ym man de wow leh wei ini toh wym mait iwa da man kamni. Wei hajrong ini da yaklam leh yei kylla i suiñ bneiñ namo ka Climate Change deiwa ong u wa ki ri wa da roi bha toh kiwa wanrah ya ini i kylla ka suiñ bneiñ wei ka India dang sdang wot ko yeini yow man kam ka ri wa da roi da paar wei ymye wow phah sangeh syndet ya ka ri wa ki kaam yong ka.
Heiyatoh wa i kaam tih mooyong da ong u wa emkaam wow em i daw hei wow pynkylla ya i rukom tih ya uni u mar wei ymye wow phah sangeh syndet ya ki bru.
Chooh chooh da ban u wa u mooyong hi toh u mar ki bru heiwa ki tre thaw da mantre ki ya oo wei ka sorkar da ye ko wow pynlait biang ya ini i kaam deiwa yaleh mukotduma.
U Conrad da ong u wa ka sorkar da chim ko wow yakhun pyrchah ya ka NGT wei da man i kaam iwa jop wei kattu toh i kaamram wow pyntikna wa da tih ya uni u mar katkam ka stat ka juk wa katni.
Da kular u leh wa ha uni u snem daw wanrah ya ki Scientific Mining License ya kiwa da pynkhreh katni iwa daw mankaam ha uni u snem dap 50 snem ka jylla.
