Shillong: Ka Bhartya Janata Party (BJP) da kam ko wa i jop wa duna dooh ha ka Election ka wow wan ha ka jylla u man ko 12 hadooh 16 ngut ha Ri-loom Khasi wa Jaiñtia katwa na Ri-loom Garo u jop wa duna toh 10 ngut.
U Vice President ka BJP Meghalaya u John Antonio Lyngdoh da ong u, “I da booh thong i wa ka BJP u jop bait ko 12 hadooh 16 ngut ki MLA na Khasi-Jaiñtia wei palat 10 ngut na Garo Hills ha kani ka Election wow wan wei u poi hi ko leh heibor synchaar ha ka jylla”.
Da ong u wa lait na ka BJP ym em de da kawi ka party kawa ye u mihsalan ha ka ri kawa e ya ka synchaar kawa bha kam ka yurim u Montri Rangbahdooh ka ri u Narendra Modi, ‘Sab ka sath sab ka vikas’ ka kawa da riñ ya ki paidbah ka ri wow e i kyrchaan ya ka BJP.
Heiyatoh wa i psiah ki ar ngut ki MLA na Jaiñtia Hills cha ka BJP, u Lyndoh da ong u wa ym phær lada psiah ki ha Meghalaya namo ha Delhi, tangwa ki da emlang ki wa ka. Ini da ong u Vice President toh hadien wa kylli kiwa thoh khubor wa ka da lai kini ki ar ngut cha Delhi toh neidaw wym kheiñ kom ki ya kiwa yahkhmat ka Meghalaya Unit.
U Lyngdoh leh da pyntip u wa u Stephanson Mukhim, MLA na Amlarem lada ym pu em psiah u cha ka BJP tangwa da e dorkhat u yei dawa kiwa tih mooyong hapoh ka lama ka Coordination of Coal Dealers and Miners Association hei yatoh wa ka Para 12 AB ka Sixth Scheduled ha u Amit Shah yow soi da u President ka ri yow pynlait ya ka khang mooyong ha kani ka jylla.
Discussion about this post