U MDC na Rambrai-Jyrngam uwa man leh u Secretary ha ka MPCC, u Bajop Pyngrope da ong u wa i thung ya u Vincent H Pala kam u President ka Meghalaya Pradesh Congress Committee (MPCC) daw wanrah ko yei kylla ha ka Party wei daw kyntu leh ya i chakri ya ki paidbah.
Da ong u wa i kylla da sdang i wow mih ha i yahkhmat u Vincent Pala, deiwa kam wa em ki MDC yong ka KHADC kiwa da pyntikna wow psiah noh wa ka Congress ha kini ki kajiak sngi wow wan. Da pynrap chooh chooh u wa ini i kylla toh neidaw wa ka Party da yoh ko ya uwa yahkhmat wa thymme, wei khamtam wa ki paidbah da yoo ki yei long i man ka jylla nadooh wa synchaar ka sorkar Meghalaya Democratic Alliance.
Da ong u wa ha kini ki le snem wa synchaar ka sorkar MDA ym em de i chong chngaaiñ neidaw wa em ki Curfew, i khang ya ki Internet wei da hiar leh ha ka kamai kajih kawa wanrah yei eh chiboon ya ki paidbah ka jylla.
Hawa kylli, u Bajop da ong u wa ki MDC kiwa da phah ktien wow psiah cha ka Congress ha kini ki kajiak sngi man ki leh kiwa mihkhmat wei ka Party daw pynkhreh ko neibynta ka Election MLA 2023 neibhah wa man ki kiwa pait bha ki paidbah cha ki, deiwa ong leh wa i wan wow pynyabi yong kitai ki MDC daw yarap leh wow nang pynku chooh chooh ya ka Party waroh kawi.
Hawa kylli chooh chooh, u MDC ka Congress da ong u wa ka Congress ym em ko yei thmu wow pynkhih ya ka Executive Committee lada wan psiah mynkna ki MDC, tangwa chong ha i sñiaw kiwa yahkhmat wa em rap hakhmat ka Party.
