Ka yung krehkaam u Deputy Commissioner ka East Jaiñtia Hills lyngba ka Assistant Commissioner da khut ko ya ka yalang ynne ka sngi ya ki Waheh Chnong wa Secretary Chnong kiwa em ha thaaiñ Narpuh neibynta wow kyrpaad ya ki wow wai noh yaka Toll Plaza kawa em ha Lumshnong neidaw wa ktah ko yei yoh nong ka NHAI nadooh wa khang ya kani ka Toll Plaza la 3 bnai kattu hadien wa pynman yaka yakhih ha u Naisaphra.
Neiliang ki Waheh Chnong kiwa wan cha kani ka yalang da pynkhor ki trait næ wa ym wai ya kani ka Toll Plaza kat wym pu pyndep ka NHAI wow pynchna wei wow siang psiang ya u sarok NH-6.
Neiliang won kiwa mihkhmat ka NHAI da e ki ya ka Report cha ka yung krehkaam u DC deiwa kam wa da dep ki wow pynchna ya 80% u sarok heiwa kiwa yahkhmat chnong da chrai ki deiwa ong wa ini toh i thok i chukor neibhah ki Contractor kiwa kreh ya uni u sarok hadooh kattæ tang 10% leh ym pu em pyndep ki yei siang psiang.
Kamtæ ki Waheh Chnong wa ki Secretary Chnong da pyntip ki cha ka Assistant Commissioner wa lada ka NHAI ym ye ko wow pyndep yei siang psiang hadooh 80-90% ym e laad wow wai ya kani ka Toll Plaza kawa em ha Lumshnong.
Kiwa yahkhmat chnong da pynsñiaw ki leh yei chrai yeini i thok ka NHAI wow li e kam kani ka Report cha u DC wei da kyntu ki leh ya ki bor District wym toh wow ngait ya kani ka Report thok wa da chna da ka NHAI kawa da kam wa da dep u chna hadooh 80% ya u sarok NH-6.
Da booh leh yei dawa na ki bor District wa neini chakhmat toh u paan ki leh yaka Report na ki chnong wa em ha Narpuh heiyatoh wa ini i pynchna ya uni u sarok nadooh Mynkre hadooh Malidor yow lait nei chah thok chah chukor ha ki heh ka NHAI.
Discussion about this post