U Montri Rangbah ka jylla, u Conrad Kongal Sangma da ong u wa oo toh u Montri Rangbah yong ka sorkar Meghalaya Democratic Alliance (MDA), ym toh u Montri Rangbah yong ka seiñ National People’s Party (NPP) wa da yahkhmat u kam u President.
U Conrad da ong u ya ini hawa kylli wa ka NPP boonsien hap ko wow jubab yei chah pynbaad pyrchah ya ka sorkar, iwa da mih leh na ki seiñ kiwa ya krehlang.
Da ong u wa hawa em iwon iwon i jia lane i chah pynbaad, kam uwa yahkhmat yong ka MDA, da hap bait u wow chim yei kitkhlieh, neibhah hapoh ka MDA ki ya krehlang ki kam kawi donhi.
Da ong chooh chooh u wa man u kam u Chairman yong ka MDA wei man u leh u Montri Rangbah yong kani ka sorkar, wei hawa em lane mih iwon iwon i wym ya sñiawthooh yumut, oo chim u yei kitkhlieh waroh wei ya kini kiyi kiyi waroh daw pynbait bait hapoh ka MDA.
U Conrad da ong u wa i eh u em bait ki hapoh ka MDA, neibhah ka toh ka sorkar synrop kawa da chna hadooh 6-7 tylli ki seiñ saiñ pyrthai wa ki MLA khlem seiñ, tangwa hanla em boon tylli leh wei hawa jia iwon iwon, i kitkhlieh da lai bait ko cha u Montri Rangbah neibhah wa man u kam uwa yahkhmat ka sorkar.
Ha iwi won i liang, hajrong i ong yong u President ka Meghalaya Pradesh Congress Committee (MPCC) u Vincent H Pala wa ka Congress daw ‘Charge Sheet’ ko pyrchah ya ka sorkar MDA, neiliang yong u Montri Rangbah da ong u wa ym em iyi iyi wow ong hajrong ini wei daw pdiang sñiawbha ya ini i kwah yong ka Congress.
U Conrad da ong u man iwa biang bha lada ka Congress kwah ko ya ini, tangwa heijooh i por da ong u wa ym da sñiawthooh kammon katæ ka ‘Charge Sheet’ mut ko, neibhah katkam i tip yong oo, i e ‘Charge Sheet’ toh u man ko katkam ki kyndon ka aiñ CrPC lane hawa leh ya kiwon kiwon ki kaam wa sih.
