Shillong: Ka Peoples’ Democratic Front (PDF) ha ka yalang yong ka Central Working Committee (CWC) da pynbait ko ya ki kynrum kynram kiwa mih ha ka party ha kini ki bnai wa dadep wei da rai wa ka Party da boohthong ko wow pynkhlan neibynta ka Election MDC wa MP ka wow man hawa sdang snem 2019.
Hawa yaklam wa kiwa pathai khubor u President ka PDF, u Ivanlumlang Marbaniang da ong u wa i suki ka Party waroh shi kattu toh neidaw wa i por ym man i iwa biang.
“I kynrum kynram ha ka Party toh iwa khian wei ynne ka sngi, da ye i wow pynbait yeini waroh wei da poi i chei sñiawthooh yumut wei waroh da man i iwi katni hadien wa da suki i ha kini ki sngi wa dadep,” da ong u Marbaniang.
Neiliang u MLA ka Party uwa man leh u montri ha ka sorkar, u Banteidor Lyngdoh da ong u wa ka Party da suki ko yei chah pynbaad ha ki laad pathai khubor toh neidaw wa kwah ko wow pynbait chwa yei kaam.
Heijooh i por ka CWC da rai ko leh wa dadep pdiang ko yei mih noh ki soo ngut ki MDC na ka party neibhah ki ym em pynyoo ki yei daw hanlada da pynbaad ki ha ki laad pathai khubor wa mih ki nei leh embor u Pynshngain N Syiem, CEM warim ka KHADC.
Heiyatoh wa u kyrtong ka party neibynta ka Election MP wa MDC neiliang ka PDF da pyntip ko wa daw chong yaklam ka Central Election Committee (CEC) ka Party ha ka 8 tarik uni u bnai.
“Neibynta ka MDC Election da rai i wow ekti ha ka CEC, u pyrchang katwa ye wow pynyieñ kyrtong ha waroh 29 tylli ki Constituency na JHADC wa KHADC,” da ong u Presdent ka PDF.
U Marbaniang da pynrap u wa hajrong ka MP Election da em ki kattu katni ngut ki waheh kiwa pynsñiaw yei mynsien wa kwah ki wow yakhun na ka PDF, tangwa daw rah chwa ha ka CEC wow bichaar wei lada emkaam daw khut leh da ki Application neibynta u kyrtong.
Discussion about this post