Kamwa 4.50 lak ngut ki Garo kiwa sah ha ki 545 tylli ki chnong wa em khappood waka Kamrup wa Goalpara District ka Assam da yatylli ki deiwa rai wow neh hapoh Assam hanla ka Meghalaya da kwah ko wa ya ki bynta kini thaw toh u pynuiñ noh ki neidaw wa mih i ya kajia.
U Alex K. Sangma uwa man kam u Chairman ka seiñ Garo Development Council (GDC) da ong wa da dawa ki wa toh u burom ya u pood wa da yabhah heipor wa chna ya ka Meghalaya ha u snem 1972. Da ong u leh wa palat 4.50 lak ngut ki Garo wa im ha Kamrup wa Goalpara District ka Assam ym em kwah ki wow pynyabi noh waka Meghalaya deiwa ekti yei thaw kam ka laad wow pynbait ya u pood hapyrdi ki ar jylla.
Da khana u leh wa da dep yachem u wa kiwa chong chnong ka Chanubi ynnin ka sngi wei da pynman yalang ha Hahim deiwa em u Montri ka Assam u Atul Bora heiwa ki paidbah da pynsñiaw ki yei jooh wa kwah ki u neh hapoh ka Assam.
Da ong u leh wa em ki thaw wa ya kajia ha Langpih wei da thooh laad wow pynbiat ya ini wa ki paidbah deiwa khana leh wa em booh ki Nepali wa sah ha khappood ka Assam-Meghalaya wei kini leh kwah ki wow neh hapoh Assam.
U Alex K. Sangma toh uwa da yahkhmat ya ka ‘Satellite Autonomous Council’ neibynta ki 8.5 lak ngut ki Garo wa em ha Assam wei ya kani ka thong da leh hapoh i pyrtuid ka United Garo Autonomous Council Movement Committee. Ka jylla Assam da chna ko da ka Garo Development Council (GDU) ynnin u snem.
Ya ka GDU da pyrchah da kiwa boon neidaw wym em dawa ya ka wei u Alex K. Sangma ym toh u Garo wei i pyrtuid tre u toh u Mahendra Barua deiwa kylli kammon uni u bru u ye u wow man kam uwa yahkhmat ki Garo.
Da em leh ki Garo kiwa chah thung kam ki Nominated Members hapoh ka GDU da u Lat ka Assam da kyntait ki wow embynta lang.