U Symbood Montri Rangbah ka jylla wa pait ya ka chnat Pulit (Home), u Prestone Tynsong da ong u wa em i duna pulit ha ka jylla hadooh kamwa 4000 ngut, wei pyntip u leh wa neiliang ka sorkar daw pyrchang ko wow pyndap noh kattu katni ki kaam pulit wa lait myntu hi u snem.
Ka chnat pulit da pynman ko ya ka Conference yong ki Superintendent of Police wa ki Commanding Officer ynne ka sngi ha nongbah Shillong, wei ya kani ka yalang da yahkhmat da u Symbood Montri Rangbah, heiwa da emlang leh u Director General of Police (DGP) ka jylla, u Dr L.R. Bishnoi wa kiwi ki heh pulit.
Hawa klam cha ki laad pathai khubor hadien katai ka yalang, u Prestone da ong u wa i eh wa ka chnat pulit yachem ko toh i duna palat ki bru wakreh, wei katkam i yukheiñ wa da yoh ki pulit ha ka jylla duna ki kamwa 3500 hadooh 4000 ngut.
Da ong u wa katni i pynpsiah kaam da lai ko ya kitu kiwa da pyndep yei yaleh ya ki Exam, wei mar ya pyndep ki yei chah sikai yei kaam yong ki, neiliang ka sorkar daw khut biang ko wow pyndap sa ya ki kaam kiwa lait wei kiwa rap emkaam jhan kiwa da booh thong wow pyndep i pynpsiah kaam ha uni hi u snem.
Ha iwi won i liang, u Prestone da pyntip u wa ha kani ka yalang da yatai leh ya kiwi ki phang wa ka chnat pulit da maad ko wei kamjooh da yaklam wow pynjanai chooh chooh i yatoh hapyrdi ki pulit wa ki paidbah.
