Shillong: Em Kamwa 9,000 ngut ki khynnah puræ ha ka jylla ki wympu em yoh ya ka bai baam Post Matric Scholarship, wei i daw toh nei pyndap bakla ya ki Form Online deiwa ban ar sien le sien ya ka jooh wei kawi won toh neidaw wa kini ki khynnah bakla ki ya ki Account Number.
Ya ini da ong u montri ka Education ka jylla, u Lahkmen Rymbui hawa jubab yeiwa kylli ka MLA ka East Shillong, ka Ampareen Lyngdoh kawa kwah wow tip lada em namo ym em ki khynroo khyllood ki wym pu yoh bai baam.
U montri da pyntip u leh wa em 54, 899 ngut ki khynnah puræ kiwa da yoh ya ki Scholarship na ka sorkar ha u snem wa dadep ha i pynlut wa kynjnoh T. 24.60 klur, wei em 68,076 ngut kiwa da pyndap (Apply) neibynta kani ka scholarship hachwa wow pynkrehkaam da ka Online wow thap Form.
U montri da ong u leh wa ka sorkar ympu yoh yutip wa ki khynnah chem chitom ki hawa pyndap Scholarship ki lyngba ka Internet, heijooh i por da ong u wa ka sorkar da yakrehlang ko wa ka NIC wow yarap ya ki khynnah wow pyndap ya ka National Scholarship Portal lyngba ki DIC wa CSC kiwa em ha waroh ki District wa ki chnong nongkyndong.
Ka Ampareen hawa pynrap chooh chooh yeiwa kylli wa lada ka sorkar da ya pynbait ko namo ym em wa ki thaw puræ (College) ya ka rukom su ya ka bai College neibhah wa boonsien ka bai puræ da haap su katwa ki Scholarship won ki khynnah ympu yoh ki ka iwa da wanrah ya i eh ya ki bei ki pa kini ki khynnah.
Discussion about this post