Ka Dorbar Chnong Panaliar, Jowai hapoh i yahkhmat u Waheh Chnong, u Riquoma Rq. Laloo, u General Secretary, u Marryngkat Syngkon deilang ki EC chnong ynne ka sngi da lai yachem ki wa ka Dr. E. Chulet, Medical Superintendent Officer yong ka MCH Hospital wa em ha Panaliar, Jowai neibynta wow pynkynmoo hajrong i thung kreh hapoh kani ka Hospital kamwa da em i thoh nadooh nachwa wa ya ki kreh namo ki Post wa khian wa nai iwa ye u thung hi da kani ka Hospital næ ka chnat yong i chait i khiah toh u pynyoh chwa ya ki khon ka chnong neibhah boon ki khon ka chnong kiwa emkaam yei khih i khan.
“Hao sñiawthooh hi wa ha ka District hi waroh kawi em ka District Selection Committee kawa toh u pait neibynta i thung kaam thung jaam wei ym em hok i iyi iyi wow batai ya kitu wa wan kreh deiwa Pass ya ka DSC exam. Tangwa neibynta ki kreh wa khian kiwa ye u thung hi da kani ka Hospital toh u pait næ thung chwa da ki khon ka chnong,” da ong u waheh chnong.
Da ong u wa i daw wa lai pynkynmoo ki ynne ka sngi leh toh wa da yoh khubor ki yei em ki Post wa lait wei da em leh i pyrchang thung sop sop, wei kopsar ka Medical Superintendent Officer wa katni ym pu em tip ko wa da em i thoh nadooh mynchwa.
U Riquoma ong u wa sñiawdiaw leh u tip na ka Medical Superintendent Officer ka MCH wa em leh ki seiñbhalang wa wan cha ka wow pynbor yei thung kreh.
Heiyatoh wa ini ong u, “Kamwa ka Panaliar hi nadooh nachwa hadooh katni yieñ ko ha ka yurim wym e laad ya kiwon kiwon ki bru samen næ ki jait seiñ wow wan luchia hapoh ka chnong ka thaw næ leh kiwon kiwon ki kaam hapoh u pood u ang khlem i tip ka dorbar chnong, lada toh ki chnat sorkar næ ki seiñbhalang, kani ka rai dang neh ko hadooh katni”.
Wei khnang yow lait na iwon iwon i thut næ sñiawthooh bakla hawa mih chakhmat neibynta i bha i miat u paidbah hapoh u pood u ang ka chnong Panaliar, kyntu u wow pyntip cha ka dorbar chnong wei ka chnong daw e bor ko ya ki wow leh ya kawon kawon ka kaam neibynta i bha i miat yong ka imlang sahlang.
Neitæ heiyatoh kiwa boon ki mat wa dang emkaam hapoh ka chnong lyngba ka chnat i chait i khiah ong u daw booddien ki deiwa yachem wa u MLA ka thaaiñ yow pynkynmoo ya ki kaam wa dang sahteiñ.
Ka mat wa ar won i lai yachem ki ynne ka sngi toh hajrong i tlep ya i khonboo wa da khlaad hapoh kpoh ka manbei i wym pu em dap bnai, heiwa da e laad ka Hospitla wow tlep ha pchem kani ka thaw sumaar neidaw wa jngai chnong ko, kamtæ ka chnong da e yumut ko wym toh de u e laad kamni tangwa u booh noh da ki aiñ ki kyndon ya ki manbei næ ki manyung wa tyngkhooh kam ini i jia wa toh u rah ki cha ki chnong ki thaw næ i thaw yong ki hi.
Discussion about this post