Uwa yahkhmat ka NPP, u Rakkam A Sangma da klam sier u wa ki kyrtong ka NPP ye ki wow jop salit ya kiwa yaleh pyrchah ha kani ka Election MP cha ka Lok Sabha.
Hawa klam ynne ka sngi wa kiwa thoh khubor, u Rakkam da ong u wa deiwa kyrkhu u Blai, ka NPP daw jop ko ha Garo Hills neibhah waroh kiwa kyrchaan ka TMC da kyrchaan lut ki yaka Congress deiwa yahbakla ya ki paidbah heiwa ka Congress katkam wa kheiñ ki da lehbha ki ha Tura.
I kyrchaan lut kiwa kyrchaan ka TMC ya u kyrtong ka Congress, da booh ko hei maa yaka kyrtong ka NPP na Tura, ka Agatha K Sangma. U Rakkam da ong u wa ki paidbah da chah yahbakla heiwa hadooh wot ki Balang niam leh da em ki yei chah sñiawthooh bakla. Tangwa heijooh i por da ong wa i kyrchaan ka BJP ya ki kyrtong ka NPP daw mankaam ko namo ym man chong ko ha ki paidbah.
Hawa yatoh waka Shillong Parliamentary Constituency, u Rakkam da ong u wa kwah u wow pyn-eh-ya daw ya kiwon kiwon kiwa jop ya kani ka Election na Shillong, tangwa toh u kynmoo wa ka jylla Meghalaya da pynlai kaam ko deiwa yoo wyrai ka sorkar pyrdi wei kiwon kiwon kiwa jop daw hap ki wow pynyatoh waka sorkar pyrdi yow tooid ki kaam pynroi.
Hanla kamtæ leh, da kwah u wa ka NPP u jop ko yaka MP na Shillong khnang wow nang ye chooh chooh wow wanrah ya ki kaam pynroi haka jylla, neibhah wa em ko i yatoh waka sorkar pyrdi.
Discussion about this post