U MDC ka Mawhati, u Charles Marngar ynne ka sngi da ong u wa ka Khasi Hills Autonomous District Council (KHADC) toh u pynyoo ko ya i bor yong ka heiyatoh wa u pood u ang ka jylla neibhah wa neiliang ka sorkar jylla wa ka Assam da lai sylli ki ya ki thaw khappood ha Ri-bhoi District, tangwa da phylla won u wow tip wa heipor wa lai sylli ha thaaiñ Khanapara, u Symbood Montri rangbah wa ki dkhot ka Boundary Committee da yachem ki ya ki paidbah heiwa da kylli pathan ki na ki paidbah heiwon haap ini i thaw?
Hawa wanrah ya i mat yañia hapoh ka Dorbar Tlang ynne ka sngi, u Charles da ong u wa ha ini i lai sylli da mih leh i kulmar wei sñiawsih neibhah wa em kiwa chong chnong kiwa sñiaw maya ya ka Assam wei haap ki cha Assam katwa em won kiwa ong wa haap ki cha Meghalaya tangwa hei sakhiat ki MDC ka Council toh u emlang ki ha katai ka sngi neibhah ka KHADC em ko i bynta wa khroo heiyatoh wa u pood u ang.
Da pynsñiaw u leh wa ka Council dadep klam ko ha ka Regional Boundary Committee wa da thung da ka sorkar wa ya u pood u ang toh u pynbait katkam ki kot ki sla wa katkam i sabut wa da booh da ki warim.
U Charles ong ong chooh chooh u wa da yoh yutip wa i kajia wa mih ha ki bnai wa dadep ha ka chnong Umlaper, ymtoh du nei pynyieñ ya ki chrot bordiñ tangwa toh nei dai khiar ya ki thaw cha ki baar jylla wei da ong u wa ka KHADC toh u phah hajir ko wow paan pynche na ki bru kiwa dai ya ki thaw wei lada chem wa emkti wa leh yeiwa bakla toh u pynchitom ya ki.
Da ong u wa heipor wa yachem ya ka Deputy Commissioner ka Ri-bhoi District wa ka Deputy Commissioner ka West Karbi Anglong da yaklam ya ki kaam pynroi wow man ki kiwa lai bait tangwa ya ki kaam wa khian ka JJM na Meghalaya ym yoh wow pynkreh ya ki.
U MDC ka Congress da ong u leh wa hanla em i yaklam hapoh ka Boundary Committee wei i pynbait pood dang lai i chaphrang tangwa i kreh ya ka Transit Camp da ka Sorkar Assam ha Khanapara dang lai i chaaid chaaid heiwa ka sorkar ym chim ko ya ka KHADC kam kawa embynta wa rap khlan wow pynbait ya u pood.
Hawa chimbynta ha kani ka sngi, u MDC ka Congress na Rambrai-Jyrngam, u Bajop Pyngrope da ong u wa sñiawsarom wa ha ka Regional Committee wa da thung da ka sorkar na waroh ar tylli ki Jylla, ya ka jylla Meghalaya da chah wow em du 7 ngut ki dkhot katwa na ka Assam em ki hadooh 40 ngut kiwa mihkhmat ha ka yalang wa man ha Assam kiwa da pynbiang lut ya ki kot ki sla wow kam ya u pood.
Ha iwi i liang u Bajop da ong u wa hanlada ka KHADC dadep mang ko T. 30 Lak neibynta wow chna ya ka Police Outpost ha Langpih, tangwa ka sorkar jylla da e daw ko wa ymye ko wow pynkreh ya ka neibhah wa ini i kaam dang em i hapyrdi i yaklam.
Hajrong ini waroh neiliang u Chief Executive Member ka KHADC, u Titosstarwell Chyne da ong u wa ka KHADC em ko ya i jooh i sur wei yieñ skem ko wa u pood u ang wa haap hapoh ka KHADC u man bait u kam u pood katkam ki Hima kiwa em hapoh ka Council, wei daw pynskem bait katkam ki kot ki sla wa ki Hima em ki.
Da pyntip u leh wa ka KHADC dadep thoh ko cha ka sorkar Assam wa Meghalaya wow pynsangeh ya ki kreh hapoh ki thaw yong ka KHADC, khamtam ya ka Transit Camp kawa em ha Khanapara heiwa ka Executive Committee hadooh katni dang booddien ko leh ya ini wei da phah leh yei pynkynmoo ha kini ki bnai wa dep.
Heiyatoh won wa i dai ya ki thaw yong u Syiem ka Raij Marwet, u CEM da ong u wa ini toh i kaam wa khia heiwa ka KHADC daw leh ko yeiwa emkaam.
Heijooh i por u CEM da ong u wa ka Boundary Committee ka KHADC da phah ko ya ka bui wei ka KHADC daw chong bichaar ko yeini chwa wow chim ya i rai.
