U montri rangbah ka jylla, u Conrad K Sangma ynne ka sngi da yachem u wa ki seiñ ki warep ha Mendipathar, North Garo Hills hei emlang ki MLA, u Marcuise Marak wa u Rupert Momin.
U Conrad da ong u wa ka sorkar katni da chimkhia ko wow kyntu kynrong ya i kaam rep hapoh ka jylla.
Da ong u wa lyngba ka Chief Minister’s Support for Producers Group, ka sorkar daw yarap poisa ko hei dur ka ‘Grant’ wow pynchlur ya kiwa seiñ khih seiñ kreh.
Chooh chooh da pyntip u wa ka Ministry of Food Processing yong ka sorkar pyrdi da e ko ya ka ‘Mega Food Park’ ha Mendipathar wow pynchlur ya i kaam rep wa kamjooh i rukom song baam, deiwa pynrap u leh wa em ka yaw wa i dawa ya ki mar wa da pynmih hapoh ka jylla.
U Conrad da ong u leh wa ka sorkar daw e yarap ko leh heiwa kammon wow song ya ki mar baam wei wow pynlai yaw ya ki heiwa ha uni u Financial Year da em 25,000 tylli ki seiñ kiwa daw yoh yarap na ka CM Support for Producers Group, heiwa daw e T. 5,000 samen ha kawi ka seiñ wa em 10 ngut ki dkhot.
Ha kani ka sngi u Conrad da lai pait u leh ya ka Rubber Storage Unit & Utility Store kawa da sdang da ka Sr. Rose hapoh yong ka Mendipathar Multipurpose Cooperative Society kamwa arphaw snem nachwa wow pynchlur ya ki kaam rep wa ki SHG.
Da tip leh ya ka Sr. Rose kam kawa da sdang u wanrah ya i rep dieñ-jri (Rubber Plantation) ha Ri-loom Garo wei ynne ka sngi u Conrad da lai pait u leh ya ki thaw pynlang ya ki jri namo ki Rubber Storage Unit ha Mendipathar heiwa da yaklam leh kammon wow kyntu kynrong ya ini i kaam rep hapoh ka thaaiñ.
