U montri rangbahdooh ka ri, u Narendra Modi hawa e i klam ha ka lyngkhooh snem wa 75 ka United Nations, da ong u wa 75 snem nachwa da sdang ya kawi ka yung krehkaam neibynta ka pyrthai waroh kawi dei thmu wa bha hadien ka thma bah wa ar.
Da ong u wa ka India kam kawi na kiwa nyngkong dooh wow soi ya ka UN Charter, ka ri leh embynta ko hajrong ini i thmu iwa pynyoo leh yei ngait (Philosophy) hapoh ka ri iwa ong ‘Vasudhaiva Kutumbakam’- iwa mut wa waroh em i ha kawi ka manyung.
Da kynmoo warom u leh ya kiwa chynna jngai heiyatoh wa i chongsuk wa i kaam pynroi kamjooh leh ki UN Peacekeeping Missions, deiwa ong wa katni ka pyrthai man ko kawa chongsuk neidaw ka United Nations.
Chooh chooh da ong u wa chiboon ki thong ka UN man ki kiwa da jop tangwa i bynta wa kongsan tam katni iwa dang sah toh wow kiar na ki kajia waki thma khian, wow pyntikna wa ye u wanrah ya ki kaam pynroi, i ktah i kylla ka suiñbneiñ (Climate Change), wow wanrah ya i man salonsar hapyrdi ki bru wa kiwi kiwi.
U Modi da ong u leh wa khlem i pynkylla yei rukom krehkaam, ka UN daw chem chitom bha ko wow yakhun ya i eh i khoo wa katni da ki stat wa ki tiar wa nachwa.
