Uwa yahkhmat ka Bharatiya Janata Party (BJP) ha Meghalaya uwa man u MLA ka Pynthorumkhrah wa u Montri warim ha ka sorkar, u Alexander Laloo Hek da ong u wa ka Congress da pdiang ko ya ka BJP, wei da em i pdiang ya ka BJP ha ka jylla neibhah wa wot ka seiñ Congress kawa pyrchah bha waroh chi kattu ya ka BJP leh katni da kwah ko wow ya krehlang.
Ki MLA ka Congress hapoh i yahkhmat yong ka Dr. Mazel Ampareen Lyngdoh ha ka 17 tarik uni u bnai da lai ki wow tyrwa ya krehlang wa ka sorkar synrop wa da yahkhmat da ka National People’s Party (NPP), heiwa kani ka sorkar synrop yong ka MDA da ya krehlang leh wa ka BJP najrong ki seiñ Ri-loom kam ka UDP, HSPDP, PDF wa ki MLA samen.
Hawa yaklam wa u Hek hajrong ini i lai luti yong ka Congress, da ong u wa ka BJP man ko kawa smat wow ya krehlang neibynta i bha i miat hapoh ka jylla lada toh wa uwon uwon leh.
Da ong u wa i lai tyrwa yong ki 5 ngut ki MLA ka Congress wow ya krehlang wa ka sorkar Meghalaya Democratic Alliance (MDA) ha kiwa boon tylli ki phang, da man iwa che kdar wa ka Congress da pdiang ko ya ka BJP katni.
Da ong wa waroh chi kattu, ka Congress ka pyrchah bait ko ya ka sorkar MDA, tangwa katni won neibhah wa da piah lyngkhot lyngkhai ym em luti de kamwi, wei da hap wow lait pynyabi wa uwon uwon wow pynyoo wa ka Party dang em ko.
Hawa kylli, u Hek da ong u wa lada ki MLA mih syndon ki na ka Congress dang rap bha ya ki neibhah lada dang em ki ha ka Party Congress ym poi cheiwon cheiwon leh.
Hajrong i em yong ka All India Trinamool Congress (AITC) ha ka Liang Pyrchah hapoh ka Yung Dorbar Chna Aiñ heithaw ka Congress, u Hek da ong u wa i em ka AITC ha ka Liang Pyrchah man ko thij kamwa em hi ka Congress nachwa neibhah u Dr. Mukul Sangma uwa man nachwa uwa yahkhmat ka Congress Legislature Party (CLP) wei katni leh man da oo hi uwa yahkhmat ka Parliamentary Party ka AITC, heiwa da pynsñiaw u leh wa ym em i ktah ya ka sorkar.
Puræ leh: Ka Congress wa thymme u krehlang ko waka sorkar MDA: Ampareen
