U MLA warim ka Ranikor, u Martin M Danggo da rai u wow yakhun biang ya ka Election MLA na ka National People’s Party (NPP) ha u snem 2023, wei ya ini da pynbna ha ka yalang wa lai psiah biang cha ka Party hadien ar snem wym embynta de.
Hawa klam ha ka yalang, u Danggo da ong u wa katwa rai ki paidbah oo hun u lada phah ki cha dujok leh. Da pyntip u wa hadien wa chah rem ha ka Election chiteiñ samoi da pyrkhat wa ki paidbah da kyntait wei ym em thmu de u wow yakhun ya ka Election, tangwa wow yarap donhi ya kiwa kwah wow yakhun.
Da pyntip chooh chooh wa ha kini ki 2 snem wa da wiar u na ka Party, u Montri Rangbah uwa man u President Rangbah ka NPP da phah u ya ki bru wow yachem ya oo, iwa da wanrah yei sñiaw ha oo samen. Da pyntip u leh wa i yachem wa u Conrad Sangma da pynsñiaw u wa ym em iyi iyi leh i pyrchah ya u Montri Rangbah wei pynsñiaw u yei sñiawngooh neibynta ka ka Civil Sub Division.
U Danggo uwa man leh u Speaker warim ka jylla da pyntip u wa ha u Naichiphaw, 2019 kiwa kyrchaan da chong pyrkhat ki wow pynyakhun biang ya u Danggo wei i rai chong ko ha oo wow yakhun na kawon ka Party. Da ong u wa chimpor 2 snem wow rai hadien wa da yasyllok wa waroh kiwa kyrchaan na waroh ki Block wa Unit yow rai u mih madan biang, deiwa ong ya kiwa kyrchaan wa katwa rai ki, oo hun u lada phah cha dujok leh.
Puræ leh: Mih noh u Danggo naka NPP
