Ki pulit ka Laitumkhrah Police Station ynne ka sngi da kem ki ya 5 ngut ki bru kiwa da pynmih kulmar ha ka miet yong ka 6 tarik ha Laitumkhrah wei ya kini ki bru da rah noh cha Kachari ynne hi ka sngi, wei neiliang ka yung bichaar da pynmih ko ya ka hukum wow kset ya kini 5 sngi ha kti ki pulit.
Katkam ka khubor wa da yoh lum, napyrdi kitai ki 5 ngut, 3 ngut toh na kawi ka liang wa 2 ngut won na kawi ka liang kiwa da ya kynaad hajan ka yung krehkaam u DHS. Neiliang ki pulit ym pu khana ki yei pyrtuid kini kiwa chah kem neidaw wa ka takit dang lai ko chakhmat.
I kem ya kitai ki bru ymtoh hajrong i thang ya ka kari pulit ha Laitumkhrah Police Station, tangwa da kem ya waroh ar liang hajrong i pynmih kulmar ha ka thaaiñ DHS hadien wa da ya muaid, itæ hachwa wow mih i kulmar ha Police Station.
Kam wow pynkynmoo wa ha miet yong ka 6 tarik uni u bnai, da mih i kynaad hapyrdi ki ar liang itæ hapyrdi ki khynnah Khasi wa ki wym toh ki Khasi ha Laitumkhrah hajan ka yung krehkaam u DHS, wei hadien i kulmar na katai ka thaw, da mih leh i kulmar hapoh Laitumkhrah Police Station hadooh wa da chah thang syndon ka kari pulit heipor wa kitai ki ar liang da lai ujor FIR ki.
