Jowai: Ka Khliehrangnah, Shangpung hadien boon snem wa yang ko ya u sarok psiang chapoh chnong (Internal Road) heiwa hadooh katni dang pynemkaam ki da u sarok khyndaw, ynnin ka 9 tarik u C. Ymbon, u Montri ka tnat bordiñ, C&RD wa GAD da wan wai u ya u mooyurim wow chna ya u sarok Khliehrangnah Internal Road uwa jrong kamwa 3 Km hapoh ka scheme Rural Infrastructure Development Fund (RIDF) XXIII uwa da mang poisa T. 2 Klur tam.
U Ymbon hei klam yong oo da kyntu u ya ki paidbah wow man ki kiwa kyllooid mynsien manda sdang u kreh ya uni u sarok ha u Naichiphaw neibhah u sarok man u u thied snaam wei lada emkaam u pynheh ya uni u sarok wow sñiawbha ki u e thaw.
Da ong u leh wa hadien wa da lait liang ki luti ki synkieñ daw wanrah ko leh ya ka roi ka paar ka yoh ka kot hapoh ka chnong.
Ya uni u sarok da pyntip wa haap pyndep u chna hapoh chi snem wei neiliang ki paidbah leh da pynsñiaw ki yei mynsien sñiawngooh wow yoh ya uni u sarok.
Ha kani ka sngi da em leh u D. Langstang u Executive Engineer, PWD (R) North Jowai Division, Jowai, ki MDC ka JHADC kiwa kynthup ya u K.M. Lytan, u Winning Sungoh, wa kiwi kiwi.
Discussion about this post