Ka Ujala Yadav kawa na chnong Holipur ka thaaiñ Saidpur, Ghazipur District, UP da kam ko wa da yoo ko ya ka Sonam Raghuvanshi ha lait ka Varanasi Railway Station wei hadien won ha ka Bus Terminal ka Varanasi hei miet ka 8 tarik uni u bnai.
Ka Ujala da kynmoo ko wa ka Sonam da emlang ko wa ki ar ngut ki chynrang kiwa dang khynroo ha lait ka Varanasi Railway Station heiwa da kylli ka Sonam ya ka mynnu u wan ka Train wow lai cha Gorakhpur.
Da kynmoo ko leh wa ha ini i por toh kamwa 10:00 waje i miet heiwa da jubab ko wa ka Train cha Gorakhpur daw poi ko heipor 3:00 waje i step wei ye ko leh wow chim da ka Bus yow lai cha Gorakhpur na ka Inter-State Bus Terminal (ISBT) kawa em pyn hajan.
Kamtæ ka Sonam da lai ko wow kylli chaphang ka Bus wow lai cha Gorakhpur ha Platform No. 7 katwa ka Ujala toh kawa dang yang ya ka Bus wow lai cha Ghazipur.
Ka Ujala da ong ko wa neidaw wa em uwa emyatoh ko wa yap, da wan ko na Lucknow yow lai liwan cha Ghazipur. Wei manda poi ko ha ISBT kawa em pyn hajan ka Varanasi Railway Station, da yoo biang ko ya ka Sonam.
Kamtæ waroh ar da lai ki cha ka jooh ka Bus kawa lai cha Gorakhpur lyngba Ghazipur wei da khana ko wa ka Sonam toh kawa tymmoh yei dur ko deiwa deiñ Scarf wei sap T-Shirt ko wei da em ko samen.
Hapoh ka Bus, ka Sonam da chong ko hajan ka Ujala wei ha iwi i por da paan ko ya ka Phone yong u bru wa chong ha chrooh ko tangwa ym em e u, wei hadien da yieñ u wei da chong u ha kawi won ka Seat, da wan ka Sonam wow chong hajan ka Ujala.
Ka Ujala da pyntip ko wa ka Sonam da paan ko wow pynemkaam ya ka Phone ko heiwa da sdang ko wow Phone tangwa Delete won ko ya ini i Number na ka Call List, chwa wow pynuiñ ya kani ka Phone.
Ka Sonam da kyrpaad ko leh ya ka Ujala wym toh ware wow pait ya ki Social Media hadien wa yoo ko wa em kiwa thoh chaphang iwa jia ha Meghalaya.
Ini i chong Bus ki toh iwa kamwa chi kynta chiteiñ wei ha ini i por kylli ma kylli ka Sonam kammon u leh yow poi cha Gorakhpur. Ka Ujala da yoh ko leh wow yoo yei dur ko chipor heipor wa dih um ko deiwa looid ya ka Scarf ko heiwa da kynjriat um ko leh yei khmat ko.
Ka Ujala da hiar ko ha Gazipur wei ka Sonam da lai ko chakhmat da ka Bus dei thmu wow poi cha Gorakhpur.
Manda poi i step da yoo ka Ujala ha TV yeiwa da chem ya ka Sonam hadien wa wiar ko 17 sngi na ka Dhaba wa em ha Nandganj heiwa ka Ujala da ong ko wa kani ka Dhaba toh kawa jngai du 10-15 Km donhi na i chnong ko wei mar ya yoo ko yei dur ko da kynmoo wa kani toh ka jooh ka bru wa chem ko hapoh ka Bus.
Ka Ujala da pyntip ko wa Phone ko cha kiwa ha-yung u Raja Raghuvanshi heiwa da yoh ko wow yaklam wa u payu u, u Sachin Raghuvanshi heiwa da khana ko yeini wa jia, kamtæ da phah ki i dur ki soo ngut ki chynrang wa da chah kem tangwa ymtoh ki jooh ki bru wa yoo ko wa emlang waka Sonam ha lait ka Varanasi Railway Station hei miet ka 8 tarik.
Ka Ujala da lai pyntip ko leh yeini cha ki pulit ka Nandganj Police Station ha Ghazipur District wei da yaklam ko leh wa ki pulit ka Meghalaya.
Kam wow pynkynmoo wa hei miet ka 8 tarik uni u bnai, ki pulit da lai kem nyngkong ki ya u Akash Rajput da ki pulit wa riam da ki sula paidbah na Lalitpur District, UP wei u Raj Kushwaha heini i por ym em pu em chah kem u wei mar ya tip u yeini da pyntip u ya ka Sonam wow wan pyndem ko.
Da antaad leh wa ka Sonam i thmu ko chwa wow em kiwa chah kem toh wow lai cha Siliguri yow kam ko wa chah rahbor ko deiwa ong wa na Meghalaya da kit ya ka cha Siliguri da ki bru wym tipmit ko.
Em won leh kiwa da antaad wa ka Sonam i thmu ko toh wow yut cha Nepal na Siliguri lane deiwa lai lyngba ka Gorakhpur cha Sunauli-Bhairawa wa em u pood Indo-Nepal wa jngai du 95 km katwa na Siliguri cha u pood Indo-Nepal ha Kakarbhitta toh iwa jngai du 36 km.
Discussion about this post