Uwa yahkhmat warim ka BJP uwa man leh u MLA warim ka Mawsynram, u Himalaya Muktan Shangpliang da pynsñiaw u yei wym bna kiwa yahkhmat ka BJP wow yaklam neibynta u pynku ya ka Party ha Meghalaya.
U Hima uwa da mih noh na ka BJP da khana u wa hadien wa da kut ka Election MLA ha uni u snem, da pyrchang u hadooh 3 sien wow yoh u yachem wa kiwa yahkhmat ka BJP uwa man leh u Montri Rangbah ka Assam, u Himanta Biswa Sarma tangwa ym yoh laad u.
Da pyntip u leh wa da pyrchang wow yaklam sa ya u National General Secretary ka BJP, u Rituraj Sinha wow khana yeiwa wa jia ha ka Party, tangwa lada Phone u boonsien leh ym yoh u, wei da ong u wa ini i rukom leh ki da pynngiah syndon i ya oo. Wei hawa khaddooh da hap u wow yaklam wa ki ar ngut ki MLA ka jylla, kitæ u AL Hek wa u Sanbor Shullai.
U Himalaya Shangpliang hadien wa da mih noh u na ka BJP ha ka 6 tarik uni u bnai da khana u wa da pyrchang wow yaklam wa u President ka BJP Meghalaya, u Ernest Mawrie wow pynkhlan ya ka Party, tangwa hadooh ka sngi wa mih u leh ym em man kaam ini.
Da ong u leh wa ym em yumut u wow em ha ka Party lada ym e laad u kreh iwa da pynman ya oo wow mih noh neibhah wym yoo u ya ka mynried lada neh hapoh ka BJP. Da ong chooh chooh u wa i duna ym toh ha ka BJP, tangwa toh ha kiwa yahkhmat ka BJP ha Meghalaya.
Discussion about this post