Ka sorkar Arunachal Pradesh ynnin ka sngi da rai ko wow khang ya ka Internet ha ki thaaiñ ka nongbah Itanagar hadien wa mih i yaleh hapydi ki pulit wa ki bru paidbah kiwa yakhih hadien wa lait tooh ki thup yukylli (Question Papers) kiwa yaleh kreh sorkar.
Ya ka Internet da pyndam nadooh 6:00 waje i janmiet ynnin ka sngi hadooh 5:00 waje i janmiet ka 19 tarik.
I lai i wan ki paidbah ha Itanagar ynnin da sangeh i hadien wa khut khang chnong nadooh i step hadooh wa miet hajrong ki 13 tylli ki phang dawa ka Pan Arunachal Joint Steering Committee(PAJSC)-APPSC hadien wa lait tooh ki Question Paper ka Arunachal Pradesh Public Service Commission (APPSC).
Ka sorkar da chim ko ya ka rai wow khang ya ka Internet hadien wa u Director General of Police da ong u wa da ktah i krehkaam ka aiñ hadien wa tympra ki paidbah ya ki tiar ki tar (Barricade) wa da pynyieñ ki pulit wei da bom lathi wei da siat bomb pynjhia khmat ki pulit hadien ini.
Ha ki Video wa da pynpoor da em leh ki pulit kiwa kawang moo ya ki paidbah.
Ka khang chnong ha Itanagar da sdang ko heipor 5:00 waje i step heiwa da em da ki hajar ngut ki paidbah kiwa da mih yow dawa pyndam yei pynsmai ya u Chairman wa thymme ka APPSC.
Ki paidbah da pynjæd ki leh ya ki Poster ka President ka ri, ka Droupadi Murmu kawa da toh u wan ha ka 20 tarik uni u bnai.
Da em leh boon ki bru paidbah wa da mynsoo hadien wa mih i ya awri awra wa ki pulit neidaw wa chah dat lathi wei chah siat Tear Gas.
Hadien ini, neiliang u Montri Rangbah ka Arunachal Pradesh, u Pema Khandu da pyndam u yei pynsmai ya u Chiarman ka APPSC wei da kyntu u leh ya ki paidbah wow man ki kiwa jai-jai. Da khut u leh ya kiwa yahkhmat ka yakhih wow yaklam wei da kular u leh wow bahkhlieh ka sorkar yei sumaar ya kiwa mynsoo.
Da ong u leh wa sñiawkhia u yeini i lait tooh kini ki Question Paper wei da chimkhia ka sorkar wow pynkhai im wei wow pynthymme ya ka APPSC yow pynman ya ka kawa khooid yow yoh laad salonsar waroh.
Kiwa yakhih da dawa ki wow pyndam noh ya waroh ki Question Paper kiwa da lait tooh wei wow kem leh ya u Chairman warim ka Commssion deilang ki Secretary, ki Member wa kiwi ki sahep. Dawa leh wow phah takit da ka yung bichaar lyngba ka Enforcement Directorate heiyatoh wa ini i jia.
Chooh chooh da dawa leh wa neini chakhmat wow pynman noh ya ki Exam da ka Union Public Service Commission, wei ka bui (Report) hajrong ini i lait tooh ki Question Paper toh u pynyoo paidbah ka wei waroh kiwa yaleh Exam toh u yoh ki mar T. 5 lak samen.
