Ka Madhya Pradesh High Court da phah ko ya ki bor sorkar wow pyntikna wym em wa thang ya ki dur bula kiwa da chna hei dur ka Sonam Raghuvanshi, kawa da chah pynbaad wa pynyap ko ya u kurim ko heipor wa lai Honeymoon cha Sohra kamjooh kiwi de kiwa chah pynbaad heini i por ka lehkmen Dasara (Dussehra) ha Indore.
Ka seiñ wa tip kam ka Paurush (People Against Unequal Rules Used to Shelter Harassment), kawa man ka seiñ na Indore da pynbna ko wa ini wa dep wa da pynkhreh ko ya ka dur bula namo ka Effigy wa em 11 tylli ki khlieh kam chibynta ka ‘Surpanakha Dahan’, heiwa daw booh yei dur ki kynthai kiwa da leh ki kaam wa chyrkhei pyrchah ya ki kurim, ki khon ki næ ya ki bei kurim pa kurim ki wei da jied ya ka Sonam Raghuvanshi kam kawi na kini.
Ka yung bichaar da ong ko wa ini i thmu toh i wym ye u pdiang neibhah wa tyngkheiñ ko ya i hok manbru (Fundamental Rights) wa da e hapoh ka Article 14 wa 21 ka Constitution.
Ka High Court da pynmih ko ya kani ka hukum hadien wa lai yaleh mukotduma ka bei ka Sonam ha ka High Court pyrchah ya kani ka seiñ.
Ka hukum da ong ko wa lada ka Sonam man ko kawa da chah pynbaad ha ki kaam pyrchah aiñ tangwa ymtoh wow chah u thang yei dur ko neibhah man ko pyrchah yei Fundamental Rights ka bei wa ka khon kamjooh waroh kawi ka yung ko.
Neiliang ka bei ka Sonam da ong ko deiwa thang yei dur bula ka khon ko daw ktah bha i yei burom yong ki kam ka yung ka sem wei yei hok yong ki wa da e hapoh ka Article 14 wa 21 ka Constitution.
Da ong ko leh wa deiwa leh kani ka seiñ kamni daw man ko kamwa thaad hakhmat ki paidbah iwa daw ktah chooh chooh yei pyrtuid ka yung ka sem ki wei i hok ki wow im dei yong ki samen.
Neiliang u Ashok Dashor kam u Convener ka ‘Paurush’ da ong u wa ka thong wow thang ya kini ki dur bula toh yow man kam ka dak wow lait na kini ki kaam sih tangwa deiwa pynmih hukum ka High Court daw bood ki yeiwa phah ko.
Discussion about this post