Ka Ministry of Information & Broadcasting da pynmih kyndon ko ynne ka sngi heiyatoh wa mih ki Advertisement ha TV (ha waroh ki Private TV Channels) kiwa yatoh wa ki Online Gaming, Fantsy Sports wa kiwi kiwi heiwa da pynsñiaw ko yei sñiawkhia wa kini ki jait Advertisment toh kiwa yahbakla wei ym em khana che ki cha ki paidbah heiyatoh waka poisa wa hap wow pynlut wa kiwi kiwi iwa man pyrchah yaka Advertising Code katkam ka aiñ Cable Television Networks (Regulation) Act, 1995 waka Consumer Protection Act, 2019.
Katkam wa ong ka Ministry wa da dep khut yalang ya kitu kiwa embynta wow pynmih ya kini ki Advertisement haka 18-11-20, deiwa emlang leh ka Advertising Standards Council of India (ASCI), News Broadcasters Association (NBA), Indian Broadcasting Foundation (IBF), All India Gaming Federation (AIGF), Federation of Indian Fantasy Sports (FIFS) waka Online Rummy Federation (ORF).
Hadien ka yaklam da mynjur wa ka ASCI daw pynmih ko yaki kyndon yow pyntikna wa ki Advertisement toh kiwa khooid ki wym yah bakla heiwa kini ki kyndon u krehkaam noh ki nadooh ka 15 tarik uni u bnai.
Kini ki kyndon kynthup ki wa ha kini ki Advertisement ym toh wow em ki bru wa hapoh 18 snem kiwa yaleh yaki Online Gaming yow jop yaka poisa yong sakhiat lane wow kdaw wa ki khynnah ye ki wow yaleh ya kini ki Online Games.
Toh u kdaw leh ha ki Advertisement wa ye u em i lut poisa kamjooh ki yalehke man ki kawa ye u kdoh u khoom ya u bru namo kiwa man Addictive wei toh u leh deiwa sñiawthooh yei maa.
Kini ki Advertisement ym toh wow pynyoo yaki heitæ i rukom wa man ko kam ka laad kamai namo wow im-ja na ka, heijooh por leh ym toh wow pynyoo wa ki bru wa leh Gaming toh kiwa hoi bru bha hawa nujor wa kiwi.
