Khang ka sorkar ya 18 tylli ki OTT Platform wa pynyoo phlim khlem akor

Ka sorkar pyrdi lyngba ka Ministry of Information & Broadcasting ynne da pynbna ko wa da khang (Banned) ya 18 tylli ki OTT Platform kiwa pynyoo ya ki phlim wa khlem akor (Pornography) wot hadien wa dep wow maham chwa ki da boon sien.

Da khang leh wow pynemkaam 19 tylli ki Website, 10 tylli ki App (7 ha Google Play Store wa 3 tylli ha ka Apple App Store) wa 57 tylli ki Social Media Account kiwa pynemkaam da kini ki OTT Platform iwa mut wa kiwa em hapoh India ym ye de ki wow yoo ya pait ya kini kattu.

U Montri ka sorkar pyrdi wa pait yaka chnat Information & Broadcasting, u Anurag Singh Thakur da ong wa da boonsien da maham ya kini ki rynsan pynyoo phlim wym toh u pynyoo ki ya ki phlim wa khlem akor wei ymtoh u chim kabu ki deiwa ong wa hap pynyoo ya kini yow man ka phlim ki kawa miat.

Hajrong ini, da khang ya kini yow lait ki paidbah u yoh u pynemkaam ki katkam ki kyndon 67 wa 67A ka IT Act, kyndon 292 ka IPC wa kyndon 4 ka Indecent Representation of Women (Prohibition) Act, 1986.

Ka Ministry of Information & Broadcasting da ong ko wa da chem wa kiwa boon ki phlim wa da pynyoo ha kini ki OTT Platform toh kiwa yoo khlem akor, kiwa pynyoo leh ya ki kynthai heitæ i rukom wym em yoo emburom.

Em leh ki wym em sap sula kiwa leh yei kaam yong waheh hapyrdi kiwa sikai wa kiwa lai puræ hadooh hapyrdi chi yung chi sem wa kiwi kiwi de kam kini ki wym emyatoh iyi iyi næ kiwa klam næ sneiñ heiyatoh waka imlang sahlang ha ki parom kini ki phlim.

Da pyntip leh wa da em kawi ka App kini ki OTT kawa da dep Download la 1 klur sien katwa kiwi ki ar tylli won da dep wow Download ki palat 50 lak sien na Google Play Store wei ha ki rynsan Social Media yong kini da emlang ki waroh 32 lak ngut kiwa bood ki.

Ka I&B Ministry da pyntip ko wa da khang leh 12 tylli ki Facebook Account, 17 tylli ki Instagram Accounts, 16 tylli ki X (Twitter) Account wa 12 tylli ki YouTube Account.

Kini ki 18 tylli ki OTT Platform wa da chah khang man ki kamni: 

Dreams Films

Voovi

Yessma

Uncut Adda

Tri Flicks

X Prime

Neon X VIP

Besharams

Hunters

Rabbit

Xtramood

Nuefliks

MoodX

Mojflix

Hot Shots VIP

Fugi

Chikooflix

Prime Play