Ka Jaiñtia National Council (JNC) Khliehriat Circle hadien wa yoh ujor na ki paidbah wa bakla kawi ka Bank kawa em ha ka chnong Khliehriat wa tip kam ka Slice Small Finance Bank wow thoh yei pyrtuid ka chnong deiwa thoh Khelerihat, neiliang ka seiñ da lai wow phah pyndam pyndooh noh yeini i bakla kani ka bank.
Ka seiñ hapoh i yahkhmat u Working President ka Khliehriat Circle, u Diamon Bareh wa u Shanbor Langstang, Vice President deilang wa i synranlang ki dkhot ka seiñ da lai ki u pyndam noh wut-wut ya ini i bakla.
Kamjooh ka seiñ da phah chna ko ya ki Signboard wa thymme ya kani ka Bank wei da dawa leh wow pynbait ya ini i bakla hapoh chibnai neibhah ini i bakla man i iwa pyndooh burom ya ka chnong.
Da phah leh wow pynbait noh yei pyrtuid ka chnong ha ki kot ka sla wa pynemkaam ka bank.
Ka JNC da maham ko leh ya ki yung krehkaam, ki dukan wa kiwi kiwi ki thaw hapoh ka thaaiñ Khliehriat wow pyntikna u thoh deiwa toh yei pyrtuid ka chnong.
Ka seiñ da ong ko leh wa lada chem ko wa kiwi kiwa leh bakla daw pynchitom ya ki katkam ki kyndon.
Discussion about this post