U MDC uwa jooh man leh kam u MLA warim ka Rymbai Legislative Assembly Constituency ya kawa da tip katni kam ka Khliehriat Legislative Assembly Constituency u Simon Siangshai da khlaad noh u ynne i step.
U ma Simon da khlaad u na ki daw wa chitom u kattu la kamwa chi bnai, wei da chah sumaar u ha Super Care Hospital, Shillong wei da wankit ya i metyap u cha Lad-Sutnga namo ha ka chnong Dkhiah East ynne ka sngi.
U ma Simon Siangshai da man u ar sien kam u MDC ka JHADC wei le sien kam u MLA wei da man u kam u Montri ka chnat Industries ka sorkar Meghalaya ha ki snem wa man MLA u.
I pyndep ya ka niam wa khaddooh toh ha ka Sngi Bibar ka 13 tarik heipor 12:00 chiteiñ i sngi ha Loomtlep-bru ka Balang Catholic.
Hajrong ini i khlaad u ma Simon Siangshai neiliang ka Seiñ Kur Phawa Siangshai da phah ko ya ka khubor khubor sñiawlem cha ki khon ki kti wa ka kurim wa ki payu yong oo.