Ka Meghalaya Table Tennis Association (MTTA) da pynsñiaw ko yei sñiawsih yei khlaad syndet uwa yaleh Table Tennis ka Tamil Nadu ha luti wa lai u cha Shillong yow chimbynta ha ka 83rd Senior National Table Tennis Championship wa pynman ha Shillong kawa toh u sdang nadooh mynstep.
U Deenadayalan Vishwa wa le ngut kiwi kiwa yalehke ka Tamil Nadu da lai luti ki da ka Tourist Taxi na Guwahati Airport cha Shillong ynne tangwa da cha tyrrah ki ha ka Truck ha Shangbangla, Ri-Bhoi.
Ini da jia i heipor kamwa 1:50 i sngi heiwa kawi ka ka Truck 12 chaka da ku ko ya i bynta wa phiah ya u sarok wei da lai tyrrah ko ya kani ka Tourist Taxi. U Vishwa da khlaad u heior wa kit ya oo cha Nongpoh Civil Hospital. Ya kiwi ki le ngut da pynkit na Nongpoh cha NEIGRIHMS, Shillong wei kini man ki kiwa da lait nei maa.
U pa u Vishwa wa kiwa hayung hasem daw wan ki cha Nongpoh mynstep yow li chim yei metyap.
Neiliang ki dkhot ka MTTA kiwa em ha Nongpoh da yarap ki wow pyndep yeiwa emkaam wei daw lai pdiang ki leh ya kiwa hayung hasem u Vishwa na Guwahati Airport mynstep. Ki bor District ka Ri-Bhoi leh da yarap ki wow pynpoi yei metyap cha Chennai.
Ka MTTA lyngba u Vice-President, u Bruce P Marak wa u General Secretary, u Chiranjib Choudhury, da pynsñiaw ki yei sñiawlem cha kiwa hayung hasem u Vishwa, uwa man leh kam uwa da em yei sap wa kyrpang bha kam uwa yaleh Table Tennis. Da jop u ya kiwa boon ki lympung yakob Junior, Sub-Junior wa ki Cadet hapoh ka ri wa cha baar ri ha i por wa tbian wei ini da man ko i dooh nong wa khroo ya ka India.
Update
Uwa yah ya kani ka kari Swift Dzire kawa em ya u Number AS-25CC-8413, u Dipal Das leh da khlaad u.
