Jowai: Ka lieñsuiñ AN 32 yong ka Indian Air Force (IAF) kawa da wiar ha ka 3 tarik uni u bnai hadien wa mih ko na Jorhat, Assam wow lai cha Mechuka Advanced Landing Ground kawa em ha Arunachal Pradesh da chem ya ka du ha ka 11 tarik uni u bnai.
Neiliang ki chipai Indian Air Force (IAF), ki Indian Army, ki pulit wa kiwi kiwi da yaleh ki wow thooh lada em kiwa lait im hadien wa da haap (crash) kani ka lieñsuiñ nadooh ka 11 tarik tangwa neidaw wa rben i khloo wei wa jrong ki loom, da man i iwa chitom wow poi ha i thaw wa haap kani ka lieñsuiñ.
Katkam ka tweet yong ka Indian Air Force da ong wa ynne i step ki 8 ngut ki dkhot kiwa da phah wow lai cha ini i thaw wa haap kani ka lieñsuiñ da poi ki ynne i step wei ka IAF da ong ko wa na kini ki 13 ngut ym em wa lait im.
Chooh chooh ka IAF da ong ko wa na kini kiwa khlaad da tip kam u W/C GM Charles, u S/L H Vinod, u F/L R Thapa, u F/L A Tanwar, u F/L S Mohanty, u F/L MK Garg, u WO KK Mishra, u Sgt. Anoop Kumar, u Cpl Sherin, u LAC SK Singh, u LAC Pankaj, u NC(E) Putali wa u NC(E) Rajesh Kumar.
U Air Marshal RD Mathur, AOC-in-C, EAC, da e khublei u ya ki bor sorkar ka Arunachal Pradesh kiwa hapoh i yahkhmat u montri rangbah ka jylla, u Pema Khandu, wa u Chief Secretary ka jylla kiwa da e yarap ya ka IAF wow thooh ya kani ka lieñsuiñ.
Discussion about this post