Uwi na ki bru wa pawkhmat bha na Jowai uwa man uwa thoh kot, uwa kreh monsñiawbha, uwa kreh wow yada ya ka rymaw kamjooh leh u Pastor yong ka Balang Unitarian, u Dr. HH Mohrmen ha kani ka kynti da rai u wow yakhun ya ka Election MLA ha u snem 2023 na Jowai Constituency.
Hawa yaklam wa u Wyrta ynne ka sngi, u Mohrmen da ong u wa i daw wa rai u wow psiah cha ka saiñ hima sima toh hadien wa yoo u wa katni kani ka kaam da hiar bha ko hapoh ka jylla wei da yoo u wa emkaam wow wanrah biang ya i burom ko kam ha ki por nachwa.
Da ong u leh wa i yaleh yong oo toh iwa khlem poisa neibhah kwah u wow wanrah yei khooid i suba ha ka Election wei ini i daw wa neiliang yong oo ym pynemkaam u ya ki Bus hawa lai yalap wei kamjooh leh wa lada ymye wow wanrah yei khooid i suba heipor Election ymye wow wanrah yei khooid i suba ha ka synchaar khadar wei i daw wa sdang i baamtooh toh wa mih i na ka Election heiwa da pynemkaam bait da i bor ka poisa.
Heijooh i por da ong u wa da jooh kreh u wa kawi ka seiñ (SURE) wei da tip bha u yeiwa emkaam ki paidbah ha palatsor deiwa pynrap leh wa boonsien ki paidbah ymtip ki ya ki Scheme wa ki kaam ka sorkar pyrdi waka sorkar jylla wei neiliang yong oo kwah u wow pynkupbor ha ki deiwa yachem wa uwa mihkhmat wei wow pynryngkat kyrdan ya ki wa kiwi tawon ki bru na sor.
Heiyatoh waka Party, da pyntip u wa nyngkong da rai u wow yakhun kam u kyrtong samen tangwa hadien wa yaklam wa ki kattu katni ki paralok da chim ya ka rai wow em ha kawi ka Party wei da em leh le tylli ki Party kiwa da kynjoh ktien ya oo wei ympu em u rai u wow psiah na kawon kawon leh.
Heiyatoh won wa i daw wa kongsan wa pynman ya oo wow yaleh ya ka Election, da ong u wa da yoo hadooh katwon ktah ka poisa nadooh i por Election hadooh i por synchaar iwa da man kam u moochynthut ha ki kaam pynroi.
Da ong u wa da rai u leh wa neiliang yong oo daw e u hadooh 80% na ka tulop cha ki paidbah heiwa daw e u leh ya ka bui (Report) chisien chisnem heiwa kammon da pynemkaam u ya ka poisa wei i rukom pynkrehkaam ya ka toh katkam ka Blueprint wow pynkrehkaam ya ka da ki paidbah.
Chooh chooh da pyntip u wa neiliang yong oo dadep thoh u leh cha ka Balang heiwa ka Balang hapoh ka jylla leh da mynjur ki yeini i thmu yong oo wei ym em u khang ki ya oo wow kreh na i kaam Balang katwa ye u wei da thung leh ya oo kam u Minister Emeritus heiwa i kaamram yong oo toh kam uwa e buit ya ka Balang. Da pyntip u leh wa neiliang yong oo da pynsñiaw u yeini i thmu yong oo ha ka yung wa ki khon yong oo wei i daw wa slem u wow rai leh toh wa slem u wow yoh ya i rai na ka Balang.
Heiyatoh wa i emkaam ya ka poisa ha ka Election, u Mohrmen da ong u wa emkaam hi ya ka poisa wei boon ki bru kubur ki wa da emkaam leh yei kylla wei lada ym em i yakrehlang kammon hi u ye u lai chaphrang deiwa e nongmuna wa “Lada sah ka kari hei ktieh emkaam wow ngiat ya ka chirup wow lait ko neitæ,” deiwa khut ya ki khon ka Jowai Constituency wow wan chaphrang wow yakrehlang neibynta i kylla.
