U MLA ka AITC na Umroi, u George B Lyngdoh hapoh ka yung dorbar chna aiñ ynne ka sngi da wanrah u ya ka phang yaklam hajrong ki chalan kit masi wa da e da ka chnat Animal Husbandry & Veterinary cha kiwa thied masi na Assam heiwa da mih khubor wa ym tip ka chnat cheiwon kit ya kini ki masi.
Da ong u wa ya kani ka phang wa yatoh wa ki masi da wanrah u la le sien hapoh ka dorbar heiwa katni ki masi leh man ki kiwa duna bha najrong wa chah pyndik kiwa dai masi wei wa ku dor ki masi wei manda jia kamni da mih sa i dai tooh wa i chalan tooh.
Da ong u wa ini i da poi hadooh u pood wa da wanrah tooh leh yei doh wa da dep ah iwa ym tip de da kiyi ki jait masi, kamjooh ym tip lada toh i doh ka masi wa kjut lane ka masi wa da dep yap deiwa pynbaad wa ini da man ko wow pynjop yei thong ka BJP wow pyntikna wym poi de i doh masi chapoh ka jylla deiwa e khublei u ya ka sorkar jylla wa stat ko u chakæ ki ki paidbah deiwa leh yeini khlem da chna lane wanrah da kawon kawon ka aiñ.
Neiliang u HM Shangpliang, u MLA ka AITC na Mawsynram da ong u wa lada ka sorkar ye ko u wanrah ya ka Piggery Mission ileh wym wanrah da ka Cattle Mission yow pynclur yei psan masi hapoh ka jylla neibhah i doh masi jooh man i i doh yong ki paidbah tangwa katni da man i i doh yong ki mahajon wa da poi i hadooh T. 600 chi kilo.
Da pyntip u leh wa dadep yaklam u wa kiwa dai doh masi kiwa da khana lada thied masi kiwa napoh ka jylla hi kiwa nachwa chongdor T. 10,000 kawi, katni da ku cha T. 20,000 hadooh T. 25,000 kawi.
Da kdaw u leh yei chah pyndik kiwa thied masi na Assam yow wanrah cha Meghalaya nadooh wa pynkrehkaam ka Assam ya ka aiñ yada masi ka Assam Cattle Preservation Act 2021 kawa da khang wow chalan masi cha kiwon kiwon ki jylla wa choh doh heiwa da e bor leh ya ki pulit ka Assam wow kem ya kiwa leh pyrchah ya ka aiñ.
Hawa e yei jubab, u Montri ka chnat Animal Husbandry & Veterinary, u Sanbor Shullai da ong u wa ha u snem 2021 i doh masi wa da baam hapoh ka jylla man i 26,000 Tonne heiwa na ini 10,000 Tonne toh iwa da pynmih hapoh ka jylla iwa mut 64% da wanrah na baar ka jylla.
Heiyatoh waka aiñ yada masi ka Assam, da pyntip u wa ka sorkar Meghalaya da dep thoh ko cha ka sorkar Assam yow lait u chah pyndik hawa wanrah masi ki nong Meghalaya kamjooh wa ka Meghalaya u e ko leh da ki Transmit Permit cha ki tre jylla kamjooh ki Cooperative Society heiwa dadep e la 280 tylli ki Transit Permit.
Chooh chooh da pyntip wa na ki por cha ki por da dep yachem wa u Montri ka chnat Animal Husbandry & Veterinary ka Assam wa ki heh pulit yow lait i chah pyndik ki nong Meghalaya wei hadooh katni ym em yoh ujor ka chnat wa em kiwa chah pyndik.
Na kiwa yaleh Permit, da em ki 54 ngut heiwa na kini da em 2 ngut kiwa na Assam wei da yoh Permit ki hadien wa da dep ki wow pynbiang ya waroh iwa emkaam. Wei ki Transit Permit da e hadooh i thaw wow lai kit ki masi.
Yow lait nei chalan pyrchah ya ka aiñ, u Montri da pyntip u wa daw booh Check Post ha Byrnihat, Umkiang, Jirang, Pynursla wa kiwi de ki thaw.
