Ka TMC Jowai Block Committee ynne ka sngi da pynskem ko ya ka Unit yong ka Party ha ka chnong Mukhla deiwa ya emlang kiwa kitkaam ka TMC Jowai Block Committee hapoh i yahkhmat u Andrew Shullai kam u President heijooh i por kam u kyrtong ka Party na ka 2-Jowai Constituency wei ha kani ka sngi da emlang leh u Madonbai Rymbai (CEM warim ka JHADC).
Ha kani ka sngi da ya mih paidbah na kylleiñ ki dong ka chnong Mukhla Pyllun kiwa da ki spah ngut ngut yow man kam ki dkhot wa kiwa kitkaam ka TMC nadooh ki manbei, ki khynroo khyllood yow pynkha ya ki Unit waphær waphær hapoh ka chnong Mukhla Pyllun wei da yoh leh yei klam na kiwa kitkaam waphær waroh yong ki Unit.
Neiliang kiwa kitkam ki Unit wa ki paidbah da iwi sur da rai wow kyrchaan pura ya u Andrew Shullai kam u kyrtong ka TMC.
Neiliang u Madonbai Rymbai hawa e yei klam da ong u wa lada kani ka sorkar MDA poi biang ko hei bor daw man ko i eh wa khroo ya kiwa kup chiliang ki sem chiliang wei leh i myntoi wa khroo ya kiwa mahajon wa ya kitæ ki High Level kamtæ da kyntu u ya ki paidbah wa toh u man ki kiwa sian wei ymtoh wow biej ya kitæ kiwa pynbiej kiwa ha rukom ha kam ini i por wei toh u pyrkhat ya ka mynried yong ki khon ki kti wei ya ka mynstep mankawi ym toh wow pyrkhat du ya iwa katni khnang wa ka ri ka jaitbru u lait ko nei jæd i pra.
Neiliang u Andrew Shullai da kyntu u ya ki paidbah wow man kiwa stat wow jied khnang wow lait i chah man mroo waroh san snem.
Ha kani ka sngi da yoh wow pynskem ya kiwa kitkaam ki Unit waroh kiwa em hapoh ka chnong Mukhla Pyllun da u Andrew Shullai.
Ki TMC Unit wa da pynskem toh ka Mukhla Nongrim Election Unit, Women’s Wing Lad Mukhla Unit, ka Women’s Wing Mukhla Mission, ka Mukhla Mission Youth Wing, ka Mukhla Sohshrieh Women’s Wing waka Kynthai Mukhla Nongrim Election Unit.
