Nongpoh: Ha ka yalang wa pynman ha yung u Dr. DD Lapang ha Nongpoh hadien wa wan u na Delhi wow li booh ya ka chithi wow mih noh kam u dkhot ka Congress hawa yaklam wa ki laad pathai khubor u Dr. D.D. Lapang da ong u, “Nga da em O ha ka Congress palat ya ka 45 tylli ki snem, nadooh katai ka por wa nga da neh O ha ka Congress wei man leh kani ka seiñ kawa pynlaitlooid ya ka ri-India deiwa em ki bru kam u Mahatma Gandhi, u Nehru kiwa jrong ka rynyieñ, wei nga leh yoh O wow chakri cha ki paidbah nadooh ka por ki bru rangbah kam ka Indira Gandhi, Narasimha Rao, Rajiv Gandhi, Manmohan Singh, kamjooh leh nga yoh O wow ya krehlang wa ka Party hadooh i por yong ka Sonia Gandhi kam ka President ka AICC.”
U Dr. Lapang da yaroh u leh ya ka Sonia Gandhi deiwa ong, “Ka Madam Sonia Gandhi, man ko ka bru wa burom oo hadooh kattæ kattæ wei ka man ko hei dur yong ka bei kawa sumaar sukhær ya i wei em ko i mynsien sniawlem cha ki nongkyndong khamtam dooh cha ki thaaiñ North East India, wei toh kani ka bru wa yahkhmat ya ka party wei heipor wa dang im u Rajiv Gandhi leh ya kreh lang ki wow pynkhlan ya ka party, tangwa da man ko kawa sñiawphylla wa ha kini ki sngi hawa da kylla ya kiwa yahkhmat ka party, hadien wa u Rahul Gandhi da chimkti u ya ka kaam kam u President ka AICC da pynmih u ya kawi ka rukom krehkaam namo ka Policy wa ki bru wa kiwa da heh rta toh u mih noh ki, wei ha kani ka yurim da em boon bha ki bru rangbah kiwa da chah sai napoh ka Party.”
“Toh heipor ka Election MLA wa kam u President da chimkti wei chimkhia O wow kheiñ yow bait u chna sorkar tangwa ha ini i por da mih i ktien na u Rahul wa da toh u pynkut noh yei krehkaam u DD Lapang kam u President neibhah wa da noh i rynyieñ u,” da ong u Lapang deiwa pynrap weileh wa u Rahul ym yang de u hadooh wa kut ka Election.
Da ong u leh waka AICC da mylliñ ko wa ya ki Politician em em ka tarik wow chongngiah ki wei oo da dam u yaleh MLA tangwa da sai noh u da u Mayral Born Syiem wow mihsalan heithaw yong oo.
Da pynsñiaw u yei sñiawngooh ya ki paidbah kiwa da pdiang burom ya oo nadooh na Airport, “Nga ym em ong O ya ki wow wan pdiang burom, tangwa da pynsñiaw oo yei sñiawngooh yeiwa pdiang burom ki ya nga nadooh na luti Airport deiwa ieh noh ya ki kaam yong ki wei wow ieh ya ka yung ka sem ka yong ki.”
U Lapang da ong u leh wa ym em iyi iyi i yaphær yumut waka AICC wei da em leh kiwa kyrpaad wow pyndam noh ya ka chithi mih noh naka Party nadooh ki heh ka AICC hadooh u Dr. Mukul Sangma.
“Nga da heh bru O wei ymye de O wow chah slem ya kam kini ki kaam wei ini i leh yong i hi wa ka Congress ymye ko wow chna sorkar neibhah ym sñiaw mantre hapoh ka Congress wei da mih uwi hadien uwi.”
“Tangwa kini waroh toh kiyi kiyi kiwa mih naka AICC wei nga ym yohsa de O wow mih noh tangwa wow psiah biang cha ka Congress KHUBLEI wei ym wan uiñ de O.”
Discussion about this post