Ka Commission of Inquiry kawa da thung da ka sorkar Meghalaya hadien wa jia i yap wei mynsoo ki boon ngut ha ka krem mooyong wa em ha Mynsngat-Thangskoo wei da khlieh ya ka Commission da u (Rtd) Justice R.S. Chauhan, da khut ko ya ki seiñ na East Jaiñtia Hills wow yaklam heiyatoh wa u mooyong yow ap u sñiaw yeiwa ong ki.
Kawi na ki seiñ wa da phah lai u DC toh ka JNC heiwa da yoh ki wow pynsñiaw hakhmat ka Commission yeiwa chah ktah ka Jaiñtia Hills nadooh wa chah khang u mooyong.
Neiliang u President ka seiñ, u Sambormi Lyngdoh da pyntip u wa kiwa khih mooyong da chem chitom ki wow pynkrehkaam ya ki kyndon ka aiñ MMDR Act deiwa tih mooyong da ka Open Cast Mining neibhah ka paar mooyong toh kawa yillu bha chapoh khyndaw wei kawa stang bha.
Wei lada leh da ka Open Cast Mining daw hap wow khloh ya chiboon bha i thaw yow sai ya kajiak donhi u mooyong iwa daw ktah joor ya ka ramaw.
Kamtæ da ong wa du deiwa pynlait ya ka Meghalaya na ka aiñ MMDR daw ye wow pteiñ yei khih mooyong hapoh Jaiñtia Hills neibhah ka 6th Schedule em ko ka kyndon wa e bor ya ka President ka ri wow pynlait nei pynkrehkaam ya kawon kawon ka aiñ.
Ka Commission da kylli ko leh ya kiwi ki laad yoh khih lait na ki wym yatoh wa u mooyong heiwa da pyntip wa ki karkhana wa em toh kiwa mantre da kiwa na baar jylla wei ki tre jylla kiwa yoh kreh ha kini ki thaw man ki du kamwa 15% donhi.
Da e buit leh ha ka Commission wa lada ka sorkar sdang ko da ki thaw wa man kam ki Skill Development Centre daw pynman ko ya ki khynroo khyllood kiwa ye u yoh kreh hapoh kini ki karkhana.
Da ban joor leh yeiwa emkaam wow pynkhlan ya ki kaam rep neibhah kini ki karkhana Cement wa Coke toh kiwa pyntngit wei pynjakhlia ya ka ramaw.
Da pynsñiaw leh yeiwa emkaam u em ki karkhana neibynta u soh khontara wa kiwa pynmih umsoh.
Neiliang ka Commission da ong ko wow booh dei thoh ya ki 7-8 tylli ki phang khnang yow ye u chim ki.
Discussion about this post